കൊച്ചി: വനിതാ മതിലില്‍ പങ്കെടുക്കുന്നതിന് സര്‍ക്കാര്‍ ഉദ്യോഗസ്ഥരെ നിര്‍ബന്ധിക്കുന്നുണ്ടോയെന്ന കാര്യത്തില്‍ വ്യക്തത വരുത്തണമെന്ന് സര്‍ക്കാരിന് ഹൈക്കോടതിയുടെ നിര്‍ദേശം.
വനിതാ മതില്‍ സംഘടിപ്പിക്കുന്നതില്‍ എന്താണ് കുഴപ്പമെന്നും കോടതി ആരാഞ്ഞു. സര്‍ക്കാര്‍ സംവിധാനങ്ങള്‍ ദുരുപയോഗം ചെയ്താണ് മതില്‍ സംഘടിപ്പിക്കുന്നതെന്ന് ഹരജിഭാഗം കോടതിയില്‍ വാദിച്ചു. രാഷ്ട്രീയ പ്രചാരണത്തിനുള്ള ഉപാധിയായാണ് പരിപാടി സംഘടിപ്പിച്ചിരിക്കുന്നതെന്നും ഹരജിക്കാര്‍ വാദിച്ചു.
സമാന ഹരജികള്‍ക്കൊപ്പം വ്യാഴാഴ്ച കേസ് വീണ്ടും പരിഗണിക്കാനായി മാറ്റി. ലിംഗ സമത്വത്തിനുവേണ്ടി നടത്തുന്ന പരിപാടിയില്‍ സര്‍ക്കാരിന്റെ പൊതു ഫണ്ടും സര്‍ക്കാര്‍ സംവിധാനങ്ങളും ഉപയോഗപ്പെടുത്തുന്നത് തടയണമെന്നാവശ്യപ്പെട്ട് വിവരാവകാശ പ്രവര്‍ത്തകന്‍ ഡി.ബി ബിനുവാണ് ഹരജി സമര്‍പ്പിച്ചത്.
പ്രളയത്തിനും ഓഖിക്കും ശേഷം സംസ്ഥാനം കടുത്ത സാമ്പത്തിക പ്രതിസന്ധിയിലാണുള്ളതെന്നും ഇത്തരം പരിപാടികള്‍ തടയണമെന്നും ഹരജിയില്‍ ആവശ്യപ്പെടുന്നു. ചീഫ് സെക്രട്ടറി, ധനവകുപ്പ് പ്രിന്‍സിപ്പല്‍ സെക്രട്ടറി, സാമൂഹിക നീതി വകുപ്പ് സെക്രട്ടറി എന്നിവരെ എതിര്‍കക്ഷികളാക്കിയാണ് ഹരജി സമര്‍പ്പിച്ചിരിക്കുന്നത്. സമാന സ്വഭാവമുള്ള ഹരജികള്‍ കോടതിയുടെ പരിഗണനയില്‍ നിലവിലുണ്ട്.