തേഞ്ഞിപ്പലം: ദേശീയപാതയില്‍ പാണമ്പ്ര വളവിനോട് ചേര്‍ന്നുള്ള ഭാഗങ്ങളില്‍ മാലിന്യങ്ങള്‍ കുമിഞ്ഞുകൂടുന്നു. നടപടിയെടുക്കാതെ അധികൃതരും അനാസ്ഥ തുടരുന്നു. പ്ലാസ്റ്റിക് മാലിന്യങ്ങള്‍ ഉപയോഗശൂന്യമായ വസ്തുക്കള്‍, കച്ചവട സ്ഥാപനങ്ങളില്‍നിന്ന് പുറന്തള്ളുന്ന വേസ്റ്റുകള്‍, മാംസാവശിഷ്ടങ്ങള്‍ തുടങ്ങി വിവിധ തരം മാലിന്യങ്ങളെകൊണ്ട് നിറയുകയാണ് ദേശീയപാതയോരം.
വിവാഹ, സല്‍ക്കാര ചടങ്ങുകളിലെ മാലിന്യങ്ങളും പലപ്പോഴും ഇവിടങ്ങളില്‍ നിക്ഷേപിക്കുന്നു. ഇടയ്ക്കിടെ കോഴിവേസ്റ്റടക്കമുള്ളത് തള്ളുന്നവരുമുണ്ട്. ഇവ അഴുകി ദുര്‍ഗന്ധമുണ്ടാകുന്നതിനാല്‍ ഇതിലൂടെ യാത്ര ചെയ്യുന്നവര്‍ മൂക്കുപൊത്തേണ്ട സ്ഥിതിയുമാണ്. ആളൊഴിഞ്ഞ പ്രദേശമായതിനാല്‍ മാലിന്യം തള്ളുന്നവര്‍ക്ക് ഇവിടെ മാലിന്യം യഥേഷ്ടം നിക്ഷേപിക്കാം. അധികൃതര്‍ അനാസ്ഥ തുടര്‍ന്നാല്‍ ഈ ഭാഗങ്ങളില്‍ ഇനിയും മാലിന്യ നിക്ഷേപം തുടരും. പ്രദേശത്ത് സി.സി.ടി.വി സ്ഥാപിക്കുന്നതടക്കമുള്ള നടപടികള്‍ സ്വീകരിച്ചാല്‍ ഒരുപരിധി വരെയെങ്കിലും ഇവിടെ മാലിന്യം തള്ളുന്നത് നിര്‍ത്തലാക്കാനാകും.