തിരൂരങ്ങാടി: സ്‌കൂളുകള്‍ കേന്ദ്രീകരിച്ചു കഞ്ചാവ് വില്‍പന സജീവമാക്കിയ യുവാവിനെ പൊലിസ് അറസ്റ്റ് ചെയ്തു. പുകയൂര്‍ കൊളക്കാടന്‍ ഷാഫി (35) യാണ് 1.25 കിലോഗ്രാം കഞ്ചാവുമായി തിരൂരങ്ങാടി എസ്.ഐ നൗഷാദ് ഇബ്രാഹിമിന്റെയും സംഘത്തിന്റെയും പിടിയിലായത്.
തിങ്കളാഴ്ച വൈകിട്ട് നാലിനു പുകയൂര്‍ മലബാര്‍ സെന്‍ട്രല്‍ സ്‌കൂള്‍ പരിസരത്തുവച്ചു കഞ്ചാവ് ചെറു പാക്കറ്റുകളാക്കുന്നതിനിടയില്‍ പിടികൂടുകയായിരുന്നെന്നു പൊലിസ് പറഞ്ഞു. കോയമ്പത്തൂരില്‍നിന്നു കൊണ്ടുവരുന്ന കഞ്ചാവ് അഞ്ചു ഗ്രാമിന്റെ പൊതികളാക്കി അഞ്ഞൂറ് രൂപയ്ക്കാണത്രേ ഇയാള്‍ വില്‍പന നടത്തിയിരുന്നത്. 76 ഗ്രാം കഞ്ചാവ് കൈവശംവച്ചതിനു കഴിഞ്ഞ മാസം ഇയാളെ അറസ്റ്റ് ചെയ്തിരുന്നു. പിന്നീട് ജാമ്യത്തിലിറങ്ങുകയായിരുന്നു.
അന്നു മുതല്‍ ഇയാളെ പൊലിസ് നിരീക്ഷിച്ചുവരികയായിരുന്നു. വിവിധ പൊലിസ് സ്റ്റേഷനുകളില്‍ ഇയാള്‍ക്കെതിരേ ഇത്തരം മൂന്നു കേസുകള്‍ ഉള്ളതായാണ് വിവരം. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.