മട്ടന്നൂര്‍: മട്ടന്നൂര്‍ നഗരത്തില്‍ മാലിന്യം തള്ളാന്‍ എത്തിയ സംഘത്തെ നാട്ടുകാര്‍ കൈയോടെ പിടികൂടി. ഇന്നലെ രാവിലെ പത്തോടെ തലശ്ശേരി റോഡിലെ പഴശ്ശി കനാലിലേക്കു മാലിന്യം ഉപേക്ഷിക്കാന്‍ ശ്രമിക്കുന്നതിനിടയിലാണു പിക്കപ്പ് ജീപ്പുമായി രണ്ടു കര്‍ണാടക സ്വദേശികള്‍ പിടിയിലായത്. ചീഞ്ഞ പച്ചക്കറി മാലിന്യമാണു പിടികൂടിയത്. പിക്കപ്പ് ജീപ്പും രണ്ടുപേരെയും പൊലിസ് കസ്റ്റഡിയിലെടുത്തു. നഗരത്തിലെ മാലിന്യം വലിച്ചെറിയുന്നത് തടയുന്നതിന്റെ ഭാഗമായി രണ്ടുമാസം മുമ്പ് ആരോഗ്യവകുപ്പ് പ്രത്യേകം സ്‌ക്വാഡ് രൂപീകരിച്ച് പരിശോധന കര്‍ശനമാക്കിയിരുന്നു. പരിശോധനയില്‍ മാലിന്യം തള്ളുന്ന നിരവധി വാഹനങ്ങള്‍ നഗരസഭാധികൃതര്‍ പിടികൂടിയിരുന്നു.