കല്‍പ്പറ്റ: ദേശീയ വിരമുക്ത ദിനാചരണത്തോട് അനുബന്ധിച്ച് ജില്ലയില്‍ ഒരു വയസിനും 19 വയസിനും ഇടയില്‍ പ്രായമുള്ള 2,46,133 കുട്ടികള്‍ക്ക് വിരക്കെതിരെ ഗുളിക നല്‍കുമെന്ന് ആരോഗ്യവകുപ്പ് അധികൃതര്‍ വാര്‍ത്താസമ്മേളനത്തില്‍ അറിയിച്ചു.
അങ്കണവാടികളിലും, വിദ്യാലയങ്ങളിലും വെച്ചാണ് വിരക്കെതിരെ ഗുളികകള്‍ നല്‍കുക. സ്‌കൂളുകളിലും, അങ്കണവാടികളിലും ആരോഗ്യപ്രവര്‍ത്തകരുടെ മേല്‍നോട്ടത്തില്‍ അങ്കണവാടി വര്‍ക്കര്‍മാരും, ക്ലാസ് ടീച്ചര്‍മാരുമാണ് ഗുളികകള്‍ നല്‍കുക. പ്ലേ സ്‌കൂളുകളിലും, സര്‍ക്കാര്‍-എയ്ഡഡ്, അണ്‍എയ്ഡഡ്, സി.ബി.എസ്.സി, ഐ.സി.എസ്.സി, കേന്ദ്രീയ വിദ്യാലയങ്ങളിലും കുട്ടികള്‍ക്ക് ഗുളികകള്‍ നല്‍കാനുള്ള സൗകര്യമുണ്ട്.
സ്‌കൂളുകളിലും, അങ്കണവാടികളിലും പോകാത്ത കുട്ടികള്‍ക്ക് ആശാപ്രവര്‍ത്തകരുടെ സഹകരണത്തോടെ അടുത്തുള്ള അങ്കണവാടിയില്‍നിന്ന് ഗുളികകള്‍ നല്‍കുന്നതാണ്. ഈമാസം 10ന് ഗുളികകള്‍ നല്‍കാന്‍ കഴിയാത്ത കുട്ടികള്‍ക്ക് 17ന് നടക്കുന്ന സമ്പൂര്‍ണ്ണ വിരമുക്തദിനത്തില്‍ ഗുളികകള്‍ നല്‍കണം.
2016 ഓഗസ്റ്റ് 10നും, 17നുമാണ് ഇതിന് മുന്‍പ് ജില്ലയില്‍ വിദ്യാഭ്യാസ വകുപ്പ്, സാമൂഹ്യനീതിവകുപ്പ്, തദ്ദേശ സ്വയംഭരണ സ്ഥാപനങ്ങള്‍ എന്നിവയുടെ സഹകരണത്തോടെ വിരമുക്തദിനം ആചരിച്ചത്. വിരമുക്തദിന പരിപാടിയുടെ ജില്ലാതല ഉദ്ഘാടനം നാളെ രാവിലെ 10ന് വാളാട് ഗവ.ഹയര്‍സെക്കന്‍ഡറി സ്‌കൂളില്‍ ജില്ലാ പഞ്ചായത്ത് പ്രസിഡന്റ് ടി ഉഷാകുമാരി നിര്‍വഹിക്കും.
ജില്ലാ പഞ്ചായത്ത് ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ ദേവകി അധ്യക്ഷയാവും. തവിഞ്ഞാല്‍ ഗ്രാമപഞ്ചായത്ത് പ്രസിഡന്റ് അനുഷ സുരേന്ദ്രന്‍ പ്രതിജ്ഞ ചൊല്ലികൊടുക്കും.