തളിപ്പറമ്പ് : മുയ്യത്ത് സി.പി.എം.പ്രവര്‍ത്തകനെ അഞ്ചംഗ സംഘം ബൈക്കില്‍ നിന്നു പിടിച്ചിറക്കി മര്‍ദിച്ചതായി പരാതി. മുയ്യം സ്വദേശി കണ്ടോത്ത് പുതിയപുരയില്‍ സാജിദി(26)നെ തലക്ക് ഗുരുതരമായ പരുക്കേറ്റ നിലയില്‍ തളിപ്പറമ്പ് സഹകരണാശുപത്രിയില്‍ പ്രവേശിപ്പിച്ചു. അക്രമികള്‍ക്കെതിരേ വധശ്രമത്തിനു കേസെടുത്തിട്ടുണ്ട്.
ഡ്രൈവറായ സാജിദ് ജോലി കഴിഞ്ഞു കഴിഞ്ഞ ദിവസം രാത്രി ബൈക്കില്‍ വീട്ടിലേക്കു പോകുമ്പോള്‍ തളിപ്പറമ്പ് പറശ്ശിനിക്കടവ് റോഡില്‍ മുയ്യം യു.പി സ്‌കൂളിനടുത്തു വച്ചു ബൈക്ക് തടഞ്ഞുവെക്കുകയും ഇരുമ്പ് വടി, കൊളുത്ത് എന്നിവ ഉപയോഗിച്ച് അക്രമിച്ചതായാണു പരാതി.
ലീഗ് പ്രവര്‍ത്തകനായിരുന്ന താന്‍ സി.പി.എമ്മില്‍ ചേര്‍ന്നതിലുള്ള വിരോധമാണ് ആക്രമണത്തിനു കാരണമെന്നും സി സുബൈര്‍, റഷീദ്, ഷിഹാഫ് എന്നിവരും കണ്ടാലറിയാവുന്ന രണ്ടു പേരുമാണ് അക്രമി സംഘത്തിലുണ്ടായിരുന്നതെന്നും പരാതിയില്‍ പറഞ്ഞു.
ഇരുമ്പ് കൊളുത്തുപയോഗിച്ചുള്ള ആക്രമത്തില്‍ തലക്ക് മാരകമായ മുറിവേറ്റിട്ടുണ്ട്. സാജിദിന്റെ നിലവിളി കേട്ട് നാട്ടുകാര്‍ ഓടിയെത്തുമ്പോഴേക്കും അക്രമി സംഘം ഓടി രക്ഷപ്പെട്ടു. വിവരമറിഞ്ഞു തളിപ്പറമ്പ് പ്രിന്‍സിപ്പല്‍ എസ്.ഐ. പി.രാജേഷിന്റെ നേതൃത്വത്തില്‍ പൊലിസ് സംഘം സ്ഥലത്തെത്തി.