തിരുവനന്തപുരം: കൊപ്രയുടെ താങ്ങുവില ക്വിന്റലിന് 9,725 രൂപയായി ഉയര്‍ത്തണമെന്ന് സംസ്ഥാന സര്‍ക്കാര്‍ കേന്ദ്ര കാര്‍ഷിക ഉല്‍പന്ന വിലനിര്‍ണയ സമിതിയോട് ആവശ്യപ്പെട്ടു.
സമിതിയുമായി നടത്തിയ ആദ്യ ചര്‍ച്ചയിലാണ് കേരളം ഇക്കാര്യം ഉന്നയിച്ചത്. കേരളത്തില്‍ നാളികേര ഉല്‍പാദനം വളരെ കുറവാണെന്നും ഈ സാഹചര്യത്തില്‍ നാളികേരത്തെ പ്രധാന വിളയായി പരിഗണിച്ചുകൊണ്ട് താങ്ങുവില ഉയര്‍ത്തണമെന്നും യോഗത്തില്‍ ആവശ്യപ്പെട്ടതായി മന്ത്രി വി.എസ് സുനില്‍കുമാര്‍ വാര്‍ത്താസമ്മേളനത്തില്‍ അറിയിച്ചു.
കൊട്ടത്തേങ്ങയുടെ താങ്ങുവില 10,700 രൂപയാക്കാനും പച്ചത്തേങ്ങയുടെത് ക്വിന്റലിന് 2,950 രൂപയാക്കാനും യോഗത്തില്‍ ആവശ്യമുയര്‍ന്നു. കേരളത്തിലെ നാളികേര ഉല്‍പാദന തളര്‍ച്ച പരിഹരിക്കാന്‍ 10 വര്‍ഷം കൊണ്ട് നടപ്പാക്കുന്ന വിപുലമായ നാളികേര വികസന പദ്ധതി കേന്ദ്ര സര്‍ക്കാരിന് സമര്‍പ്പിക്കും. വിവിധ പദ്ധതികള്‍ ഏകോപിപ്പിച്ച് അഞ്ചുവര്‍ഷം വീതമുള്ള രണ്ടുഘട്ടങ്ങളായി പദ്ധതി നടപ്പാക്കാനാണ് ഉദ്ദേശിക്കുന്നത്.
നാളികേര വികസനം ലക്ഷ്യമിട്ട് പദ്ധതി നടപ്പാക്കുന്നതിന് നാളികേര ഏകോപന കമ്മിറ്റി രൂപീകരിച്ച് ഈ മാസം ഉത്തരവിറങ്ങും. നാളികേരത്തില്‍നിന്ന് മൂല്യവര്‍ധിത ഉല്‍പന്നങ്ങള്‍ തയാറാക്കാന്‍ ആദ്യത്തെ അഗ്രോപാര്‍ക്ക് കോഴിക്കോട്ട് സ്ഥാപിക്കും. ഇതിനായി വിശദമായ പദ്ധതി രൂപരേഖ തയാറാക്കാന്‍ തീരുമാനിച്ചിട്ടുണ്ടെന്നും മന്ത്രി പറഞ്ഞു.
നാളികേര കര്‍ഷകര്‍ക്ക് ഉല്‍പന്നത്തിന് മികച്ച വില ലഭിക്കേണ്ടതുണ്ടെന്ന് കമ്മിഷന്‍ ചെയര്‍മാന്‍ ഡോ. വി.പി ശര്‍മ്മ പറഞ്ഞു. വെളിച്ചെണ്ണയ്ക്കുപുറമെ മറ്റ് മൂല്യവര്‍ധിത ഉല്‍പന്നങ്ങള്‍ തയാറാക്കുന്നതിന് പ്രാധാന്യം നല്‍കണം.
ഇവയ്ക്ക് അഭ്യന്തര വിപണിക്കുപുറമെ വിദേശ വിപണിയും കണ്ടെത്താനാവും. അഗ്രോ പാര്‍ക്കുകള്‍ സ്ഥാപിക്കുന്നതിന് ആവശ്യമായ സഹായം കേന്ദ്ര ഭക്ഷ്യസംസ്‌കരണ വ്യവസായ മന്ത്രാലയത്തില്‍നിന്ന് കേരളം തേടണമെന്നും അദ്ദേഹം നിര്‍ദേശിച്ചു.
വാര്‍ത്താസമ്മേളനത്തില്‍ കാര്‍ഷികോല്‍പാദന ഡയറക്ടര്‍ ടിക്കാറാം മീണ, കൃഷിവകുപ്പ് ഡയറക്ടര്‍ എ.എം സുനില്‍കുമാര്‍, സംസ്ഥാന അഗ്രികള്‍ച്ചറല്‍ പ്രൈസസ് ബോര്‍ഡ് സെക്രട്ടറി പി. സുബ്രഹ്മണ്യം, കേരഫെഡ് ചെയര്‍മാന്‍ ജെ. വേണുഗോപാലന്‍ നായര്‍, എം.ഡി എന്‍. രവികുമാര്‍ പങ്കെടുത്തു.