അഞ്ചല്‍: ജനുവരി ഒന്നിന് നടക്കുന്ന വനിതാ മതിലിന് ഐക്യദാര്‍ഢ്യം പ്രഖ്യാപിച്ച് ചടയമംഗലം ബ്ലോക്ക് പഞ്ചായത്തിന്റെ നേതൃത്വത്തില്‍ നൂറുകണക്കിന് വനിതകള്‍ പ്രതീകാത്മക വനിതാ മതില്‍ തീര്‍ത്തു. ചടയമംഗലം ബ്ലോക്ക് പഞ്ചായത്ത് പ്രസിഡന്റ് എസ്. അരുണാ ദേവി, ചിതറ ഗ്രാമപഞ്ചായത്ത് പ്രസിഡന്റ് സുജിത കൈലാസ്, ഇളമാട് ഗ്രാമപഞ്ചായത്ത് പ്രസിഡന്റ് എസ്. ചിത്ര, കെ.പി.എം.എഫ് ജില്ലാ ഖജാന്‍ജി എസ്. സുഷ ബാബു തുടങ്ങിയവരും മതിലില്‍ അണിചേര്‍ന്നു.
വനിതാ മതിലിന്റെ പ്രവര്‍ത്തനങ്ങള്‍ ത്വരിതപ്പെടുത്താന്‍ ബ്ലോക്ക് പഞ്ചായത്ത് പ്രസിഡന്റിന്റെ അധ്യക്ഷതയില്‍ യോഗവും ചേര്‍ന്നു. ചടയമംഗലം ഗ്രാമപഞ്ചായത്ത് പ്രസിഡന്റ് രാധാകൃഷ്ണന്‍ നായര്‍, സാമൂഹ്യ പിന്നാക്ക മുന്നണി സ്റ്റേറ്റ് ജന. സെക്രട്ടറി എഫ്. ജോയി, കെ.പി.എം.എസ് പ്രതിനിധികളായ എസ്. സൈജു, ആര്‍. ബിജുകുമാര്‍ തുടങ്ങിയവര്‍ യോഗത്തില്‍ സന്നിഹിതരായി.