വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ വിദേശകാര്യ നയങ്ങളെ ചൊല്ലി മുതിര്‍ന്ന ഉപദേഷ്ടാക്കള്‍ തമ്മില്‍ തര്‍ക്കം രൂക്ഷമാകുന്നു. വിഷയത്തില്‍ ട്രംപിന്റെ രണ്ട് മുതിര്‍ന്ന സഹായികള്‍ക്കിടയില്‍ ഉടലെടുത്ത തര്‍ക്കം തെരുവിലേക്ക് നീങ്ങുകയാണ്. അതിനിടെ ദേശീയ സുരക്ഷാ ഉപദേഷ്ടാവ് എച്ച്.ആര്‍ മക്മസ്റ്ററുടെ രാജി ആവശ്യപ്പെട്ട് ഒരു സംഘം റിപബ്ലിക്കന്‍ പാര്‍ട്ടി അംഗങ്ങള്‍ രംഗത്തെത്തി.
മക്മസ്റ്ററും ട്രംപിന്റെ മറ്റൊരു ഉപദേഷ്ടാവായ സ്റ്റീവ് ബാനണും തമ്മിലാണ് തര്‍ക്കം ഉടലെടുത്തിരിക്കുന്നത്. ബാനണുമായി ബന്ധമുള്ള വെബ്‌സൈറ്റും ചില റിപബ്ലിക്കന്‍ പാര്‍ട്ടി അംഗങ്ങളും ഇറാന്‍ വിഷയത്തില്‍ ട്രംപിന്റെ നടപടിയെ വിമര്‍ശിച്ചു രംഗത്തെത്തിയിരുന്നു. മക്മസ്റ്റര്‍ അനാവശ്യമായി ഇസ്‌റാഈലിനെ പിന്തുണക്കുകയാണെന്നും ഇറാനോട് വെറുതെ ശത്രുത പുലര്‍ത്തുകയാണെന്നുമായിരുന്നു സംഘത്തിന്റെ പ്രധാന വിമര്‍ശനം. 200 ദിവസം പൂര്‍ത്തിയാകാനിരിക്കുന്ന ട്രംപിന്റെ ഭരണകാലയളവില്‍ നിരവധി ഉദ്യോഗസ്ഥരെ പുറത്താക്കിയതിലും ഇവര്‍ ശക്തമായ വിയോജിപ്പ് രേഖപ്പെടുത്തിയിട്ടുണ്ട്. ഇതിനു പിന്നില്‍ മക്മസ്റ്ററിനു പങ്കുണ്ടെന്നായിരുന്നു ഇവരുടെ ആരോപണം.
ഇക്കാര്യത്തില്‍ അടുത്തിടെ നടന്ന വൈറ്റ്ഹൗസ് യോഗത്തില്‍ മക്മസ്റ്ററും സ്റ്റീവ് ബാനണും തമ്മില്‍ രൂക്ഷമായ വാക്കേറ്റം നടന്നിരുന്നു. ട്രംപിന്റെ മുന്‍ സുരക്ഷാ ഉപദേഷ്ടാവ് മൈക്കല്‍ ഫ്‌ളിന്നുമായി ബന്ധമുള്ളവരോ ബാനന്റെ അടുത്തയാളുകളോ ആയ മൂന്നു ദേശീയ സുരക്ഷാ ജീവനക്കാരെ മക്മസ്റ്റര്‍ പുറത്താക്കിയതും ഇരുവരും തമ്മിലുള്ള തര്‍ക്കം രൂക്ഷമാക്കി. എന്നാല്‍ തര്‍ക്കം ഇപ്പോള്‍ മറനീക്കി പുറത്തെത്തിയിരിക്കുകയാണ്.
'ഫയര്‍ മക്മസ്റ്റര്‍' എന്ന പേരില്‍ സമൂഹമാധ്യമങ്ങളില്‍ മക്മസ്റ്ററെ സ്ഥാനത്തുനിന്നു നീക്കണമെന്ന് ആവശ്യപ്പെട്ട് വ്യാപകമായ കാംപയിനും നടക്കുന്നുണ്ട്. ട്രംപ് ഭരണകൂടത്തില്‍ കൂടുതല്‍ ശക്തമായ സ്വാധീനമുള്ളയാളാണ് മക്മസ്റ്റര്‍. എന്നാല്‍, ബാനണ്‍ ഉള്‍പ്പെടേയുള്ളവരോടും ട്രംപിന്റേത് അനുകൂലമായ നിലപാട് ആയതിനാല്‍ ഇക്കാര്യത്തില്‍ അദ്ദേഹം എന്തു നിലപാടെടുക്കുമെന്ന കാര്യം വ്യക്തമല്ല.