തിരുവനന്തപുരം: മുന്‍ഗണനാ വിഭാഗത്തില്‍പ്പെട്ട റേഷന്‍ കാര്‍ഡുടമകളുടെ പട്ടികയില്‍ കയറിക്കൂടിയ അനര്‍ഹരെ കണ്ടെത്താന്‍ വിവിധ വകുപ്പുകളുടെ സഹായം തേടിയിട്ടുണ്ടെന്ന് ഭക്ഷ്യമന്ത്രി പി. തിലോത്തമന്‍. എ പ്രദീപ് കുമാറിന്റെ ശ്രദ്ധക്ഷണിക്കലിന് മറുപടി പറയുകയായിരുന്നു മന്ത്രി.
അനര്‍ഹരായ നാലുചക്ര വാഹന ഉടമകളെ കണ്ടെത്താന്‍ മോട്ടോര്‍ വാഹന വകുപ്പില്‍ നിന്ന് വിവരങ്ങള്‍ ശേഖരിക്കും. 1000 ചതുരശ്ര അടിയിലേറെ വിസ്തീര്‍ണമുള്ള വീട്ടുടമകളെ കണ്ടെത്താന്‍ തദ്ദേശ സ്വയംഭരണ വകുപ്പില്‍ നിന്നും വിദേശ ജോലിയുള്ളവരുടെ വിവരങ്ങള്‍ നോര്‍ക്കയില്‍ നിന്നും ഒരേക്കറിന് മേല്‍ ഭൂമിയുള്ളവരുടെ വിവരങ്ങള്‍ റവന്യൂ വകുപ്പില്‍ നിന്നും ശേഖരിക്കാനും നടപടിയെടുത്തിട്ടുണ്ട്.
റേഷന്‍ കാര്‍ഡുകളുടെ ഡേറ്റാബേസില്‍ ആധാര്‍ വിവരങ്ങളും ശേഖരിച്ചിട്ടുണ്ട്. ഏകദേശം 90 ശതമാനം ജനങ്ങളുടെ ആധാര്‍ വിവരങ്ങള്‍ ഇതിനകം ലഭ്യമായതിന്റെ അടിസ്ഥാനത്തില്‍ കൃത്രിമ കാര്‍ഡുകള്‍ കണ്ടെത്തി ഒഴിവാക്കാനാവും.
മുന്‍ഗണനാ പട്ടികയില്‍ നിന്ന് ഒഴിവായി പോയിട്ടുള്ള അര്‍ഹതപ്പെട്ട പട്ടികജാതി കുടുംബങ്ങളെയും മത്സ്യതൊഴിലാളികള്‍, തോട്ടം, കയര്‍, കശുവണ്ടി തുടങ്ങിയ പരമ്പരാഗത തൊഴിലാളികള്‍ ഉള്‍പ്പെടുന്ന കുടുംബങ്ങളെയും പ്രത്യേക പരിഗണന നല്‍കി മുന്‍ഗണനാ പട്ടികയില്‍ ഉള്‍പ്പെടുത്താനും നടപടി സ്വീകരിക്കും. മുന്‍ഗണനാ പട്ടികയില്‍ നിന്നൊഴിവായി പോയിട്ടുള്ള അര്‍ഹതപ്പെട്ടവര്‍ക്ക് ചികിത്സാ ആനുകൂല്യങ്ങള്‍ നിഷേധിക്കപ്പെടാതിരിക്കാന്‍ ജില്ലാ കലക്ടര്‍മാരുടെ ഉത്തരവ് പ്രകാരം റേഷന്‍ കാര്‍ഡില്‍ പ്രത്യേകം മുദ്ര പതിപ്പിച്ച് നല്‍കാന്‍ നിര്‍ദേശം നല്‍കിയിട്ടുണ്ട്.
പരാതിക്കാരെ നേരില്‍ കേട്ടും ആവശ്യമായ കേസുകളില്‍ വകുപ്പ് ഉദ്യോഗസ്ഥന്‍മാര്‍ ഫീല്‍ഡ് തല പരിശോധന നടത്തിയും പരാതികള്‍ പൂര്‍ണമായും പരിഹരിക്കുമെന്നും മന്ത്രി പി തിലോത്തമന്‍ നിയമസഭയില്‍ പറഞ്ഞു.