ദോഹ: ബഹ്‌റൈനു പിന്നാലെ തങ്ങളുടെ വ്യോമ പാതയില്‍ ഖത്തര്‍ വിമാനങ്ങള്‍ക്കു ഭാഗിമായ ഇളവ് നല്‍കാന്‍ യു എ ഇയും തീരുമാനിച്ചു. വ്യോമയാനവുമായി ബന്ധപ്പെട്ട യു എന്‍ സംഘടനായ ഇന്റര്‍നാഷനല്‍ സിവില്‍ ഏവിയേഷന്‍ ഓര്‍ഗനൈസേഷന്റെ (ഐ സി എ ഒ)നിര്‍ദേശ പ്രകാരമാണു തീരുമാനം. വ്യോമപാതയുമായി ബന്ധപ്പെട്ട അന്താരാഷ്ട്ര ചട്ടങ്ങള്‍ പാലിക്കണമെന്ന് സംഘടന ഈയിടെ ഉപരോധ രാജ്യങ്ങളോട് ആവശ്യപ്പെട്ടിരുന്നു.

ഉപരോധം ആരംഭിച്ച് രണ്ടു മാസത്തിനു ശേഷം നടക്കുന്ന സുപ്രധാന ചുവട്‌വയ്പ്പാണ് ഖത്തറിനെ സംബന്ധിച്ചിടത്തോളം വ്യോമ പാതയില്‍ ലഭിച്ച ഇളവ്.
നോട്ടാംസ്(പൈലറ്റുമാര്‍ക്ക് വിവരം നല്‍കുന്ന നോട്ടീസ്) വഴിയാണ് ഈ രാജ്യങ്ങള്‍ റൂട്ടുകളില്‍ ഇളവു നല്‍കുന്ന കാര്യം പ്രഖ്യാപിച്ചത്.

ആഗസ്ത് 7 മുതല്‍ ഈ വര്‍ഷം നവംബര്‍ 6 വരെയാണ് റൂട്ട് ബാധകമാവുക. ദോഹയിലേക്കു വരുന്ന വിമാനങ്ങള്‍ക്കു മാത്രമാണ് ഈ പാത ഉപയോഗിക്കാനാവുക. ബഹ്‌റൈന്‍ വ്യോമപാത ഖത്തറിനെ ചുറ്റിനില്‍ക്കുന്നതിനാല്‍ ഇതിലേക്കുള്ള പ്രവേശനം ഖത്തര്‍ എയര്‍വെയ്‌സിനെ സംബന്ധിച്ചിടത്തോളം പ്രധാനമാണ്. ആഗസ്ത് 17 മുതല്‍ കൂടുതല്‍ വ്യോമപരിധി ഖത്തറിനായി തുറന്നു നല്‍കുമെന്നും ബഹറയ്ന്‍ അറിയിച്ചിട്ടുണ്ട്.

വ്യോമപാത അടച്ചതിന്റെ നിയമ സാധുത ചോദ്യം ചെയ്ത് ഖത്തര്‍ സമര്‍പ്പിച്ച അപേക്ഷ പരിഗണിക്കാന്‍ ചേര്‍ന്ന ഐ സി എ ഒ യോഗത്തിലാണ് പുതിയ റൂട്ട് സംബന്ധിച്ച് തീരുമാനമുണ്ടായത്. കഴിഞ്ഞയാഴ്ചയാണ് യോഗം ചേര്‍ന്നത്.