റിയാദ്: സഊദി അറേബ്യയില്‍ തൊഴില്‍ മേഖലയില്‍ പരിഷ്‌കരിച്ച നിതാഖാത്ത് അടുത്ത മാസം മുതല്‍ നിലവില്‍ വരുമെന്ന് തൊഴില്‍, സാമൂഹിക വികസനകാര്യ മന്ത്രാലയം അറിയിച്ചു. അഞ്ചു മുതല്‍ ഒന്‍പതു വരെ ജീവനക്കാരുള്ള സ്ഥാപനങ്ങള്‍ക്കാണ് പരിഷ്‌കരിച്ച സഊദി വല്‍ക്കരണ പദ്ധതിയായ നിതാഖാത്ത് നടപ്പാക്കുന്നത്. നിലവില്‍ ഒന്‍പതില്‍ കുറവ് ജീവനക്കാരുള്ള സ്ഥാപനങ്ങള്‍ നിതാഖാത്ത് പരിധിയില്‍ ഉള്‍പ്പെട്ടിരുന്നില്ല. അതേസമയം നാല് ജീവനക്കാര്‍ വരെയുള്ള സ്ഥാപനങ്ങള്‍ക്ക് നിതാഖാത്ത് ബാധകമാക്കില്ല. നിലവില്‍ നിതാഖാത്ത് ബാധകമല്ലാത്ത സ്ഥാപനങ്ങളെ സഊദി തൊഴില്‍ മന്ത്രാലയം രണ്ടു വിഭാഗങ്ങളാക്കി തരംതിരിച്ചിട്ടുണ്ട്.

അഞ്ചു മുതല്‍ ഒന്‍പതു വരെ ജീവനക്കാരുള്ള സ്ഥാപനങ്ങളും ഒന്നു മുതല്‍ നാല് വരെ ജീവനക്കാരുള്ള സ്ഥാപനങ്ങളുമായാണ് ഇവ തിരിച്ചിരിക്കുന്നത്. അടുത്ത ഘട്ടം മുതല്‍ അഞ്ചു മുതല്‍ ഒന്‍പതു വരെ ജീവനക്കാരുള്ള സ്ഥാപനങ്ങള്‍ക്കാണ് നിയമം ബാധകമാക്കുന്നതെങ്കിലും ഒന്ന് മുതല്‍ നാല് വരെ ജീവനക്കാരുള്ള സ്ഥാപനങ്ങളെ ചെറിയ സ്ഥാപനമായി കണക്കാക്കി നിതാഖാത്തില്‍ നിന്നും തീര്‍ത്തും ഒഴിവാക്കും. നിതാഖാത്ത് പദ്ധതി നടപ്പാക്കി തുടങ്ങിയ ശേഷം രാജ്യത്ത് സ്വകാര്യ മേഖലയില്‍ സഊദി ജീവനക്കാരുടെ എണ്ണം 18 ലക്ഷത്തിലധികമായി ഉയര്‍ന്നിട്ടുണ്ട്. എങ്കിലും ഇപ്പോഴും രാജ്യത്തെ തൊഴില്ലായ്മ നിരക്ക് 12.7 ശതമാണെന്നാണ് കണക്കുകളെന്നു തൊഴില്‍ മന്ത്രാലയം വ്യക്തമാക്കുന്നു.