കല്‍പ്പറ്റ: ഹയര്‍ സെക്കന്‍ഡറി നാഷണല്‍ സര്‍വിസ് സ്‌കീം സപ്തദിന സഹവാസ ക്യാംപിന്റെ സംസ്ഥാനതല ഉദ്ഘാടനം നാളെ ജില്ലയില്‍ നടക്കുമെന്ന് കല്‍പ്പറ്റ നഗരസഭ ചെയര്‍പേഴ്‌സണ്‍ സനിത ജഗദീഷ് വാര്‍ത്താസമ്മേളനത്തില്‍ അറിയിച്ചു.  കല്‍പ്പറ്റ എസ്.കെ.എം.ജെ ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് യൂനിറ്റിന്റെ സഹവാസ ക്യാംപാണ് സംസ്ഥാനതലത്തില്‍ ഔപചാരികമായി ഉദ്ഘാടനം ചെയ്യപ്പെടുന്നത്. പെരുന്തട്ട ഗവ. എല്‍.പി സ്‌കൂളില്‍ നടക്കുന്ന ക്യാംപ് ഒ.ആര്‍ കേളു എം.എല്‍.എ ഉദ്ഘാടനം ചെയ്യും. നഗരസഭ ചെയര്‍പേഴ്‌സണ്‍ സനിത ജഗദീഷ് അധ്യക്ഷയാവും. ചലച്ചിത്രതാരം അബുസലിം എന്‍.എസ്.എസ് വളണ്ടിയര്‍മാര്‍ക്കുള്ള ബാഡ്ജ് വിതരണവും നിര്‍വഹിക്കും. ഹയര്‍ സെക്കന്‍ഡറി എന്‍.എസ്.എസ് സംസ്ഥാന പ്രോഗ്രാം കോഡിനേറ്റര്‍ ഡോ. ജേക്കബ് ജോണ്‍ മുഖ്യ പ്രഭാഷണം നടത്തും. ഉദ്ഘാടനത്തോടനുബന്ധിച്ച് രാവിലെ 9.30ന് വെള്ളാരംകുന്ന് മുതല്‍ ക്യാംപ് നടക്കുന്ന പെരുന്തട്ട സ്‌കൂള്‍ വരെ വിളംബരജാഥ നടത്തും. 10.30ന് പതാക ഉയര്‍ത്തലും 11.30ന് ഉദ്ഘാടന സമ്മേളനവും നടക്കും. എസ്.കെ.എം.ജെ ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ എ. സുധാറാണി, നഗരസഭ കൗണ്‍സിലര്‍ കെ.ടി ബാബു, എസ്.കെ.എം.ജെ ഹയര്‍ സെക്കന്‍ഡറി എന്‍.എസ്.എസ് പ്രോഗ്രാം ഓഫിസര്‍ കെ.എസ് ശ്യാല്‍, പി.ടി.എ പ്രസിഡന്റ് പി.സി നൗഷാദ് എന്നിവരും വാര്‍ത്താസമ്മേളനത്തില്‍ പങ്കെടുത്തു.