മാഡ്രിഡ്: ലോക റെക്കോര്‍ഡ് തുകയ്ക്ക് ബ്രസീല്‍ സൂപ്പര്‍ താരം നെയ്മറിനെ പി.എസ്.ജിക്ക് വിട്ടുകൊടുത്ത സ്പാനിഷ് വമ്പന്‍മാരായ ബാഴ്‌സലോണ മറ്റൊരു ബ്രസീല്‍ താരത്തെ പാളയത്തിലെത്തിക്കാനുള്ള ശ്രമത്തിന്റെ അവസാന വട്ട ഒരുക്കത്തിലെന്ന് റിപ്പോര്‍ട്ടുകള്‍. ലിവര്‍പൂളില്‍ നിന്ന് 25 കാരനായ ബ്രസീല്‍ പ്ലേമേക്കര്‍ ഫിലിപ്പ് കുട്ടീഞ്ഞോയെയാണ് ബാഴ്‌സലോണ ടീമിലെത്തിക്കാനുള്ള ശ്രമം നടത്തുന്നത്. ബാഴ്‌സലോണ ആസ്ഥാനമായുള്ള സ്‌പോര്‍ട് എന്ന പത്രമാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. ഏതാണ്ട് 90 മില്ല്യണ്‍ യൂറോയ്ക്കാണ് താരത്തെ കറ്റാലന്‍ കരുത്തന്‍മാര്‍ സ്വന്തമാക്കാനൊരുങ്ങുന്നതെന്ന് പത്രം റിപ്പോര്‍ട്ട് ചെയ്യുന്നു. മറ്റ് ആനുകൂല്യങ്ങളടക്കം 120 മില്ല്യണ്‍ യൂറോയാണ് താരത്തിന് വാഗ്ദാനം ചെയ്തിരിക്കുന്നതെന്നും റിപ്പോര്‍ട്ടിലുണ്ട്. നെയ്മറിന്റെ വിടവ് നികത്താനുള്ള പ്രതിഭ കുട്ടീഞ്ഞോയ്ക്കുണ്ടെന്നാണ് ബാഴ്‌സ അധികൃതര്‍ പ്രതീക്ഷിക്കുന്നത്. മെസ്സിക്കും സുവാരസിനുമൊപ്പം മുന്നേറ്റത്തിലും ആന്ദ്രെ ഇനിയെസ്റ്റയ്‌ക്കൊപ്പം മധ്യനിരയിലും ഒരുപോലെ ഉപയോഗപ്പെടുത്താമെന്ന അധിക മികവ് ബ്രസീല്‍ തരത്തിനുണ്ടെന്ന വിലയിരുത്തലുകളുമാണ് കുട്ടീഞ്ഞോയെ പ്രിയങ്കരമാക്കി നിര്‍ത്തുന്ന ഘടങ്ങള്‍. നേരത്തെ ആറ് മാസം എസ്പാന്യോളിനായി ലോണില്‍ കളിച്ചതിനാല്‍ സ്പാനിഷ് ലാ ലിഗയില്‍ താരത്തിന് മുന്‍പരിചയവുമുണ്ട്.