സ്‌കോപ്‌ജെ: ഇസ്‌ക്കോ മാജിക്കില്‍ ഇംഗ്ലീഷ് കരുത്തരായ മാഞ്ചസ്റ്റര്‍ യുനൈറ്റഡിനെ വീഴ്ത്തി റയല്‍ മാഡ്രിഡ് യുവേഫ സൂപ്പര്‍ കപ്പ് കിരീടം നിലനിര്‍ത്തി. ഫൈനലില്‍ ഒന്നിനെതിരേ രണ്ട് ഗോളുകള്‍ക്കാണ് റയലിന്റെ വിജയം. ചാംപ്യന്‍സ് ലീഗ് ജേതാക്കളും യൂറോപ്പ ചാംപ്യന്‍മാരും ഏറ്റുമുട്ടുന്ന സീസണിന് മുന്നോടിയായുള്ള പോരാട്ടമാണ് സൂപ്പര്‍ കപ്പ്. ഇത് നാലാം തവണയാണ് റയല്‍ കിരീടം സ്വന്തമാക്കുന്നത്. കഴിഞ്ഞ വര്‍ഷം സ്പാനിഷ് ടീം തന്നെയായ സെവിയ്യയെ വീഴ്ത്തിയായിരുന്നു റയലിന്റെ കിരീട നേട്ടം.
കളി തുടങ്ങി 24ാം മിനുട്ടില്‍ കസെമിറോയിലൂടെ റയല്‍ ലീഡ് സ്വന്തമാക്കി. രണ്ടാം പകുതിയുടെ 52ാം മിനുട്ടില്‍ ഇസ്‌ക്കോ റയലിന് രണ്ടാം ഗോള്‍ സമ്മാനിച്ച് ലീഡുയര്‍ത്തി. എന്നാല്‍ എവര്‍ട്ടനില്‍ നിന്ന് മാഞ്ചസ്റ്റര്‍ സ്വന്തം പാളയത്തിലെത്തിച്ച ലുകാകു 62ാം മിനുട്ടില്‍ ഒരു ഗോള്‍ മടക്കി ലീഡ് കുറച്ചെങ്കിലും പിന്നീട് ഗോളടിക്കാന്‍ അനുവദിക്കാതെ റയല്‍ അന്തിമ വിജയവും കിരീടവും തങ്ങളുടെ ഷോക്കേസിലേക്ക് തന്നെ എത്തിച്ചു. കളിയില്‍ കൂടുതല്‍ സമയം പന്ത് കൈവശം വച്ചതും പാസുകള്‍ കൈമാറിയതും ഷോട്ടുകള്‍ ഉതിര്‍ത്തതും റയലായിരുന്നു. റയലിന്റെ ആദ്യ ഗോളിന് കാര്‍വജലും രണ്ടാം ഗോളിന് ഗെരത് ബെയ്‌ലുമാണ് വഴിയൊരുക്കിയത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോ അവസാന ഏഴ് മിനുട്ട് മാത്രമാണ് കളത്തിലിറങ്ങിയത്. കരിം ബെന്‍സമയ്ക്ക് പകരമാണ് പോര്‍ച്ചുഗല്‍ നായകന്‍ കളത്തിലെത്തിയത്.