സ്റ്റീപിള്‍ചേസിലെ നിലവിലെ ഒളിംപിക് ചാംപ്യന് ലോക പോരാട്ടത്തിലും സ്വര്‍ണം. കെനിയയുടെ കോണ്‍സെസ്‌ലുസ് കിപ്‌റുടോയാണ് ലോക പോരാട്ടത്തിലും സുവര്‍ണ നേട്ടം ആവര്‍ത്തിച്ചത്. 8.14.12 സെക്കന്‍ഡിലാണ് താരം ഫിനിഷ് ചെയ്തത്. മൊറോക്കോ താരം സഫിയന്‍ എല്‍ബക്കലി 8.14.49 സെക്കന്‍ഡില്‍ വെള്ളി നേടിയപ്പോള്‍ നിലവിലെ ഒളിംപിക് വെള്ളി മെഡല്‍ ജേതാവ് അമേരിക്കയുടെ ഇവാന്‍ ജഗറിനാണ് വെങ്കലം. 8.15.53 സെക്കന്‍ഡിലാണ് താരം മത്സരം പൂര്‍ത്തിയാക്കിയത്.
800 മീറ്ററില്‍ പുതിയ ചാംപ്യന്‍
പുരുഷന്‍മാരുടെ 800 മീറ്ററില്‍ പുതിയ ചാംപ്യന്‍. ഫ്രാന്‍സിന്റെ പിയറെ ആംബ്രോയിസ് ബോസ് 1.44.67 സെക്കന്‍ഡില്‍ ഫിനിഷ് ചെയ്ത് സ്വര്‍ണം സ്വന്തമാക്കി. നിലവിലെ വെള്ളി മെഡല്‍ ജേതാവ് പോളണ്ടിന്റെ ആദം സോട് ഇത്തവണയും വെള്ളി കൊണ്ട് തൃപ്തിപ്പെട്ടു. കെനിയയുടെ കിപ്യഗോണ്‍ ബെറ്റിനാണ് വെങ്കലം.