മാള: പാളയംപറമ്പില്‍ ഓട്ടുകമ്പനി തൊഴിലാളിയായ അസം സ്വദേശിയെ കൊലപ്പെടുത്തിയ കേസില്‍ ബംഗാള്‍ സ്വദേശിയായ സുഹൃത്തിനെ മാള പൊലിസ് അറസ്റ്റ് ചെയ്തു. ബംഗാളിലെ ആലിപ്പൂര്‍വാര്‍ ജില്ലയിലെ ബാലിറോം ഉറോണ്‍(39) ആണ് അറസ്റ്റിലായത്. അസം സ്വദേശി ജൗഹറുല്‍ ഇസ്‌ലാമിനെ(26)നെയാണ് ഇയാള്‍ കഴിഞ്ഞ ദിവസം കരിങ്കല്ല് കൊണ്ട് തലയ്ക്കടിച്ച് കൊലപ്പെടുത്തിയത്. സംഭവത്തിന് ശേഷം ഒളിവില്‍ പോയ ബാലിറോം ഉറോണിനെ വടക്കാഞ്ചേരിയില്‍ നിന്നാണ് പൊലിസ് പിടികൂടിയത്.
തിങ്കളാഴ്ച രാത്രിയാണ് ഇരുവരും തമ്മില്‍ വാക്കേറ്റമുണ്ടായതും കൊലപാതകം നടന്നതുമെന്ന് പൊലിസ് പറഞ്ഞു. പഴൂക്കരയിലെ ഒരു ഓട്ട് കമ്പനിയിലെ ജോലിക്കാരനാണ് ബാലിറോം ഉറോണ്‍. ഇയാളുടെ ഭാര്യയുടെ കൂടെ കൊല്ലപ്പെട്ട ജൗഹറുല്‍ ഇസ്‌ലാമിന്റെ സഹോദരന്‍ താമസിക്കുന്നതുമായി ബന്ധപ്പെട്ട തര്‍ക്കമാണ് കൊലപാതകം നടത്താന്‍ കാരണമെന്നാണ് സംശയിക്കുന്നത്. ഇതുമായി ബന്ധപ്പെട്ട് ഇരുവരും തമ്മില്‍ ഇടക്കിടെ വാക്ക് തര്‍ക്കങ്ങളുണ്ടാകാറുണ്ടെന്ന് സുഹൃത്തുക്കള്‍ പറയുന്നു. മല്‍പ്പിടുത്തത്തിനിടയില്‍ ജൗഹറുല്‍ ഇസ്‌ലാം ബോധം കെട്ടുവീണു. ഈ സമയത്ത് സമീപത്ത് കിടന്ന കരിങ്കല്ലെടുത്ത് തലക്കിടിക്കുകയായിരുന്നെന്ന് മാള പോലിസ് പറഞ്ഞു. ചൊവ്വാഴ്ച രാത്രി 10 മണിയോടെ വടക്കാഞ്ചേരിയില്‍ നിന്ന് പ്രതിയെ കസ്റ്റഡിയിലെടുത്തത്.