തിരൂരങ്ങാടി: റോഡരികില്‍നിന്ന് വാങ്ങിയ കൈതച്ചക്ക കഴിച്ചവര്‍ക്ക് ദേഹാസ്വാസ്ഥ്യം. കുടുംബത്തിലെ മൂന്ന് പേര്‍ ആശുപത്രിയില്‍. മൂന്നിയൂര്‍ തലപ്പാറ സ്വദേശികളായ വലിയപറമ്പില്‍ വീട്ടില്‍ പൂക്കാടന്‍ അഷ്‌റഫ് (40), ഭാര്യ ഷാഹിദ (35), മകന്‍ അന്‍ഷിഫ് റഹ്മാന്‍(16) എന്നിവരെയാണ് തിരൂരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചത്. ചൊവ്വാഴ്ച ദേശീയപാത പടിക്കല്‍ നിന്നുമാണ് വാഹനത്തില്‍ കൊണ്ടുവന്ന് വില്‍പന നടത്തുന്ന പൈനാപ്പിള്‍ വാങ്ങിയത്. ബുധനാഴ്ച രാത്രി പൈനാപ്പിള്‍ കഴിച്ച അഷ്‌റഫിനും ഭാര്യ ഷാഹിദക്കും അസഹ്യമായ വയറുവേദയും ഛര്‍ദ്ദിയും ദേഹാസ്വസ്ഥ്യവും അനുഭവപ്പെടുകയായിരുന്നു. വ്യാഴാഴ്ച രാവിലെ പൈനാപ്പിള്‍ കഴിച്ചതോടെ മകന്‍ അന്‍ഷിഫ് റഹ്മാനും ഇതേ അവസ്ഥ അനുഭവപ്പെട്ടു. തുടര്‍ന്ന് മൂവരെയും ആശുപത്രിയില്‍ പ്രവേശിപ്പിച്ചു. പൈനാപ്പിളില്‍ തളിച്ച മാരക കീടനാശിനിയാണ് ആരോഗ്യ പ്രശ്‌നങ്ങള്‍ സൃഷ്ടിച്ചതെന്നാണ് ആരോഗ്യ വകുപ്പധികൃതരുടെ വിലയിരുത്തല്‍.