കൊച്ചി: പുതുവൈപ്പ് സമരവുമായി ബന്ധപ്പെട്ട് പൊലിസ് സ്റ്റേഷനിലെ സി.സി. ടി.വി ദൃശ്യങ്ങള്‍ ഹാജരാക്കണമെന്ന് മനുഷ്യാവകാശ കമ്മിഷന്‍ നിര്‍ദേശിച്ചു. പുതുവൈപ്പ് എല്‍.പി.ജി പ്ലാന്റിനെതിരായ സമരവുമായി ബന്ധപ്പെട്ട പൊലിസ് നടപടിയില്‍ കമ്മിഷന്‍ ഇന്നലെ വാദം കേട്ടു. ഡി.സി.പിയായിരുന്ന യതീഷ് ചന്ദ്രയുടെയും സമര സമിതി പ്രവര്‍ത്തകരുടെയും വാദങ്ങള്‍ കമ്മിഷന്‍ കേട്ടു. സമരക്കാരെ കസ്റ്റഡിയിലെടുത്ത നഗരത്തിലെ നാല് പൊലിസ് സ്‌റ്റേഷനുകളില്‍ നിന്നുള്ള സി.സി.ടിവി ദൃശ്യങ്ങള്‍ സമര്‍പ്പിക്കാന്‍ കമ്മിഷന്‍ ഉത്തരവിട്ടു.
പൊലിസ് മര്‍ദ്ദിച്ചുവെന്ന സമരസമിതിക്കാരുടെ പരാതിയില്‍ സെപ്തംബറില്‍ നടക്കുന്ന സിറ്റിങില്‍ തെളിവെടുപ്പ് നടത്തുമെന്ന് കമ്മിഷന്‍ അറിയിച്ചു. എഡിറ്റ് ചെയ്യാത്ത ദൃശ്യങ്ങളടങ്ങിയ സി.ഡി ഹാജരാക്കണമെന്ന് കമ്മിഷന്‍ നിര്‍ദേശിച്ചു. സംഭവവുമായി ബന്ധപ്പെട്ട് സത്യവാങ്മൂലം സമര്‍പ്പിക്കാന്‍ കമ്മിഷന്‍ യതീഷ് ചന്ദ്രയ്ക്ക് നിര്‍ദേശം നല്‍കി. കുട്ടികളെ മര്‍ദ്ദിച്ചുവെന്ന സമരക്കാരുടെ പരാതി അടിസ്ഥാന രഹിതമാണെന്ന് യതീഷ് ചന്ദ്ര വാദിച്ചു.
തെളിവെടുപ്പ് നടക്കുന്നതിനിടെ പലപ്പോഴും യതീഷ് ചന്ദ്രയും സമരക്കാരുമായി തര്‍ക്കമുണ്ടായി. മനുഷ്യാവകാശ കമ്മിഷന്‍ ആക്ടിങ് ചെയര്‍മാന്‍ പി. മോഹനദാസ് കാക്കനാട് കോണ്‍ഫറന്‍സ് ഹാളില്‍ നടത്തിയ സിറ്റിങില്‍ 64 പരാതികളാണ് പരിഗണിച്ചത്.