റിയാദ്: ഖത്തര്‍ വിമാനങ്ങള്‍ക്ക് സഊദി വ്യോമ മേഖല ഉപയോഗിക്കുന്നതിനുള്ള വിലക്ക് തുടരുമെന്ന് സഊദി ജനറല്‍ അതോറിറ്റി ഓഫ് സിവില്‍ ഏവിയേഷന്‍ വ്യക്തമാക്കി. സഊദി വ്യോമ പാതയും വിമാനത്താവളങ്ങളും ഉപയോഗിക്കുന്നതിനുള്ള വിലക്ക് തുടരും. സഊദി അറേബ്യയിലെയും ഖത്തറിനെ ബഹിഷ്‌കരിച്ച മറ്റു രാജ്യങ്ങളിലെയും വ്യോമ മേഖലകള്‍ ഖത്തര്‍ വിമാനങ്ങള്‍ ഉപയോഗിച്ചുവെന്ന വാര്‍ത്തകള്‍ ശരിയല്ലെന്നും ഏവിയേഷന്‍ അതോറിറ്റി പ്രസ്താവനയില്‍ പറഞ്ഞു.

ഖത്തറിനെതിരെ ബഹിഷ്‌കരണം പ്രഖ്യാപിച്ച രാജ്യങ്ങള്‍ അന്ത്രാഷ്ട്ര നിയമങ്ങള്‍ പാലിക്കാന്‍ താല്‍പര്യം കാണിക്കുന്നതിനെ ഇന്റര്‍നാഷണല്‍ സിവില്‍ ഏവിയേഷന്‍ ഓര്‍ഗനൈസേഷന്‍ യോഗം പ്രശംസിച്ചിട്ടുണ്ട്. ഫ്‌ളൈ റഡാര്‍ 24 പോലുള്ള സൈറ്റുകളിലെ ചിത്രങ്ങള്‍ കൃത്യമാകില്ല. മേഖലയിലെ റസീവറുകളുടെയും ട്രാന്‍സ്മിറ്ററുകളുടെയും ലഭ്യതയാണ് ഇത്തരം സൈറ്റുകള്‍ അവലംബിക്കുന്നത്. ഇത്തരം ഉപകരണങ്ങളുടെ അഭാവത്തില്‍ ഏറ്റവും ഹൃസ്വമായ റൂട്ടുകളാണ് സിസ്റ്റം കാണിക്കുകയെന്നും അതോറിറ്റി പറഞ്ഞു.

ഖത്തറിനെതിരേ മറ്റു രാജ്യങ്ങള്‍ ബഹിഷ്‌കരണം പ്രഖ്യാപിച്ചതു മുതല്‍ ഖത്തര്‍ വിമാനങ്ങള്‍ക്ക് സമുദ്രത്തിനു മുകളിലുള്ള വ്യോമ മേഖലയിലൂടെ ബദല്‍ പാതകള്‍ നിശ്ചയിച്ചിരുന്നു. സമുദ്രത്തിനു മുകളില്‍ ഖത്തറുമായി സഊദി വ്യോമ പാത പങ്കിടുന്നില്ല. അന്താരാഷ്ട്ര വ്യോമ പാതകളിലെ തിരക്കുകള്‍ കുറക്കുന്നതിനും ഈ രാജ്യങ്ങള്‍ തുടക്കത്തില്‍ ശ്രമിച്ചിട്ടുണ്ടെന്നും അതോറിറ്റി പറഞ്ഞു. ഖത്തറില്‍ വിമാനങ്ങള്‍ക്ക് തങ്ങളുടെ വ്യോമ പാത തുറന്നു കൊടുത്തിട്ടില്ലെന്നു യു എ ഇയും ബഹ്‌റൈനും വ്യക്തമാക്കിയിട്ടുണ്ട്.