തലശ്ശേരി: തലശ്ശേരി-അഞ്ചരക്കണ്ടി റൂട്ടിലെ കൊടുവള്ളി റെയില്‍വേ ഗേറ്റ് തുറക്കാനാകാത്തതിനെ തുടര്‍ന്ന് കൊളശ്ശേരി-കുയ്യാലി മേഖലയില്‍ ഗതാഗതം താറുമാറായി. ഇന്നലെ രാവിലെ മുതലാണ് ഗേറ്റ് തുറക്കാനാവാതെ വന്നത്. തുടര്‍ന്ന് വാഹനങ്ങള്‍ കൊളശ്ശേരി, കുയ്യാലി വഴിയും കൊളശ്ശേരി-എരഞ്ഞോളിപ്പാലം വഴിയും തിരിച്ചുവിടുകയായിരുന്നു. ഇതേതുടര്‍ന്ന് മേഖലയില്‍ കനത്ത ഗതാഗത തടസം നേരിട്ടു. രാവിലെ തിരുവന്തപുരം-മംഗളൂരു എക്‌സ്പ്രസ് പോകാനായി ഗേറ്റ് അടച്ചതിന് ശേഷം ഗേറ്റ് തുറക്കാനാകാതെ വരികയായിരുന്നു. ഗേറ്റിന്റെ റോപ്പ് പൊട്ടി ഗേറ്റ് കുരുങ്ങിക്കിടക്കുകയായിരുന്നു. ഈസമയം ഗേറ്റിന്റെ ഇരുവശത്തും നിരവധി വാഹനങ്ങള്‍ ഉണ്ടായിരുന്നു. ഏറെനേരം പണിപ്പെട്ടിട്ടും ഗേറ്റ് തുറക്കാന്‍ കഴിയാതെ വന്നതോടെ വാഹനങ്ങള്‍ വഴി തിരിച്ച് വിടുകയായിരുന്നു.