ആലക്കോട്: വിനോദ സഞ്ചാരികളുടെ ഇഷ്ടകേന്ദ്രമാവുകയാണ് ഉദയഗിരി പഞ്ചായത്തിലെ കര്‍ണാടക വനാതിര്‍ത്തിയായ വായിക്കമ്പ. മഴക്കാലത്ത് നിരവധി വിനോദ സഞ്ചാരികളാണ് കാടിന്റെയും പുഴയുടെയും ഭംഗി ആസ്വദിക്കാന്‍ ദിവസേന ഇവിടെയെത്തുന്നത്. തളിപ്പറമ്പ്-കൂര്‍ഗ് ബോര്‍ഡര്‍ റോഡിലൂടെ 39 കിലോമീറ്റര്‍ സഞ്ചരിച്ചാല്‍ വായിക്കമ്പയിലെത്താം. കൊടും വേനലില്‍ പോലും പച്ചപുതച്ചു കിടക്കുന്നതാണ് ഈ അതിര്‍ത്തി ഗ്രാമം.
തളിപ്പറമ്പ്-കൂര്‍ഗ് ബോര്‍ഡര്‍ റോഡ് അവസാനിക്കുന്നത് കേരള-കര്‍ണാടക സംസ്ഥാനങ്ങളെ വേര്‍തിരിക്കുന്ന പുഴയോരത്താണ്. ഇവിടെ നിന്നു താല്‍ക്കാലികമായി നിര്‍മിച്ച മരപ്പാലത്തിലൂടെ മറുകര കടന്നാല്‍ കര്‍ണാടക വനത്തില്‍ പ്രവേശിക്കാം. വനത്തില്‍ നിന്നു ഉത്ഭവിച്ചു നിറഞ്ഞൊഴുകുന്ന പുഴയുടെ ശബ്ദവും സൗന്ദര്യവും ആരെയും ആകര്‍ഷിക്കും. കിലോമീറ്ററുകളോളം കര്‍ണാടക വനത്തില്‍ കൂടി ഒഴുകി ജനവാസ പ്രദേശത്തെത്തുന്ന പുഴയിലെ വെള്ളത്തിന് ഔഷധ ഗുണമുണ്ടെന്നാണ് നാട്ടുകാരുടെ വിശ്വാസം.
ഏതുസമയവും മൂടിക്കെട്ടിയ അന്തരീക്ഷവും കാടിന്റെ നിഗൂഡ സൗന്ദര്യവും സഞ്ചാരികള്‍ക്ക് നല്‍കുന്ന ഉന്മേഷം വലുതാണ്. കര്‍ണാടക വനംവകുപ്പ് അധികൃതരുടെ പ്രത്യേക അനുമതിയോടെ കാടിനുള്ളില്‍ കൂടി ഏറെനേരം നടക്കാനും സാധിക്കും. കയാക്കിങ് പോലുള്ള ജലവിനോദങ്ങളില്‍ ഏര്‍പ്പെടുന്നതിന് വിദേശ രാജ്യങ്ങളില്‍ നിന്നുപോലും ഇവിടെ ആളുകളെത്തുന്നു.
സഞ്ചാരികള്‍ക്കാവശ്യമായ അടിസ്ഥാന സൗകര്യങ്ങള്‍ ഒരുക്കുന്നതുള്‍പ്പെടെയുള്ള നടപടികള്‍ അധികൃതരുടെ ഭാഗത്ത് നിന്നുണ്ടായാല്‍ കണ്ണൂരിന്റെ വിനോദ സഞ്ചാര ഭൂപടത്തില്‍ വായിക്കമ്പയും സ്ഥാനം പിടിക്കും.