മലപ്പുറം: പൊതുജനങ്ങളുടെ പ്രശ്‌നങ്ങള്‍ നേരിട്ടു പരിഹരിക്കുന്നതിനു ജില്ലാകലക്ടര്‍ അമിത് മീണയുടെ നേത്യത്വത്തില്‍ സംഘടിപ്പിക്കുന്ന ജനസമ്പര്‍ക്ക പരിപാടിയിലേക്കു ലഭിച്ചത് 2,387 പരാതികള്‍. പൊതുജനങ്ങളുടെ പ്രശ്‌നങ്ങള്‍ക്ക് ഉടന്‍ പരിഹാരം നിര്‍ദേശിക്കുന്ന തരത്തിലാണ് ജനസമ്പര്‍ക്ക പരിപാടി ആവിഷ്‌ക്കരിച്ചിരിച്ചിട്ടുള്ളത്.
കഴിഞ്ഞ മാസം 24 മുതല്‍ ഈ മാസം അഞ്ചുവരെയുള്ള ദിവസങ്ങളിലാണ് അക്ഷയ കേന്ദ്രങ്ങള്‍ വഴി പൊതുജനങ്ങളില്‍നിന്നു പരാതികള്‍ സ്വീകരിച്ചത്. നിശ്ചിത സമയത്തിനകം പരാതി നല്‍കാന്‍ കഴിയാത്തവര്‍ക്കു ജനസമ്പര്‍ക്ക പരിപാടിയുടെ വേദിയിലും പരാതി നല്‍കാം. എന്നാല്‍, ഇവരുടെ പരാതിക്കു തത്സമയം പരിഹാരമുണ്ടാകില്ല. മുഖ്യമന്ത്രിയുടെ ദുരിതാശ്വാസനിധിയില്‍നിന്നു ധനസഹായത്തിനുള്ള അപേക്ഷ, എ.പി.എല്‍-ബിപി.എല്‍ കാര്‍ഡുമായി ബന്ധപ്പെട്ട അപേക്ഷ എന്നിവ സംബന്ധമായ പരാതികള്‍ സ്വീകരിക്കില്ല.
16നു കൊണ്ടോട്ടിയിലാണ് പരിപാടി തുടങ്ങുക. 18നു പൊന്നാനിയിലും 21നു തിരൂരങ്ങാടി, 23നു നിലമ്പൂര്‍, 24നു പെരിന്തല്‍മണ്ണ, 29ന് ഏറനാട്, 30നു തിരൂര്‍ എന്നിവിടങ്ങളിലും പരിപാടി നടക്കും.