വാടാനപ്പള്ളി: ചേറ്റുവ പടന്നയില്‍ പൂട്ടിക്കിടന്ന വീട് കുത്തിതുറന്ന് മോഷണം.
അറക്കല്‍കുറുപ്പത്ത് അബ്ദുള്‍ഗഫൂറിന്റെ വീട്ടിലാണ് മോഷണം. വീടിന്റെ വാതില്‍ കുത്തിത്തുറന്ന് അകത്ത് കടന്ന മോഷ്ടാവ് അലമാരയില്‍ സൂക്ഷിച്ചിരുന്ന രണ്ട് പവന്‍ സ്വര്‍ണം, രണ്ട് ലാപ്‌ടോപ്പ്, ഒരു ടാബ്, മൂവി കാമറ, ടോര്‍ച്ച് , വാച്ച് മോഷ്ടിച്ചു. അലമാരയില്‍ സൂക്ഷിച്ചിരുന്ന മുഴുവന്‍ സാധനങ്ങളും വാരി വലിച്ചിട്ട നിലയിലാണ്. രണ്ട് ലക്ഷം രൂപയുടെ നഷ്ടം കണക്കാക്കുന്നു.അബ്ദുള്‍ ഗഫൂറും കുടുംബവും വിദേശത്താണ്. കഴിഞ്ഞ ദിവസം വീട് വൃത്തിയാക്കാന്‍ വന്നവര്‍ വാതില്‍ കുത്തിതുറന്ന നിലയില്‍ കണ്ട് പരിശോധിച്ചപ്പോഴാണു മോഷണവിവരം അറിയുന്നത്.
പിന്നീട് ലാപ്‌ടോപ്പിന്റെ ബാഗ് വീടിനു സമീപത്തെ പുഴയില്‍ നിന്ന് കണ്ടെടുത്തു. വിരലടയാള വിദഗ്ധര്‍ പരിശോധന നടത്തി.
വാടാനപ്പള്ളി പൊലിസ് കേസെടുത്തു.