പാലാ: പാലാ ലിസ്യൂ കാര്‍മലൈറ്റ് കോണ്‍വെന്റിലെ സിസ്റ്റര്‍ അമല(69)യെ കൊലപ്പെടുത്തിയ കേസില്‍ കുറ്റക്കാരനെന്ന് കണ്ടെത്തിയ പ്രതി കാസര്‍കോട് സ്വദേശി വെഴുവാതട്ടുങ്കല്‍ സതീഷ് ബാബു (സതീഷ് നായര്‍-41)നെ ജീവപര്യന്തം തടവിന് ശിക്ഷിച്ച് പാലാ അഡിഷനല്‍ ജില്ലാ സെഷന്‍സ് കോടതി ജഡ്ജി കെ. കമനീസ് വിധി പുറപ്പെടുവിച്ചു. വിവിധ വകുപ്പുകള്‍ പ്രകാരം കഠിന തടവിനും പിഴ ഒടുക്കാനും വിധിച്ചിട്ടുണ്ട്.
ഐ.പി.സി 302 (കൊലപാതകം) പ്രകാരം ജീവപര്യന്തം തടവിനും ഒരു ലക്ഷം രൂപ പിഴ ഒടുക്കാനും അല്ലാത്തപക്ഷം മൂന്നു വര്‍ഷം കഠിന തടവിനും ഐ.പി.സി 376 (ബലാത്സംഗം) പ്രകാരം പത്തു വര്‍ഷം കഠിന തടവിനും അന്‍പതിനായിരം രൂപ പിഴ ഒടുക്കാനും പിഴ ഒടുക്കാത്ത പക്ഷം രണ്ടു വര്‍ഷം കഠിന തടവിനും ഐ.പി.സി 449 (ഭവന ഭേദനം) പ്രകാരം ഏഴു വര്‍ഷം കഠിന തടവിനും മുപ്പതിനായിരം രൂപ പിഴ ഒടുക്കാനും അല്ലാത്തപക്ഷം ഒരു വര്‍ഷം കഠിന തടവിനും ഐ.പി.സി 457 (അതിക്രമിച്ചു കയറല്‍) പ്രകാരം മൂന്നു വര്‍ഷം കഠിന തടവിനും മുപ്പതിനായിരം രൂപ പിഴ ഒടുക്കാനും അല്ലാത്തപക്ഷം ഒന്‍പത് മാസം കൂടി കഠിന തടവിനും ശിക്ഷിച്ചു.
വിവിധ വകുപ്പുകള്‍ പ്രകാരമുള്ള ശിക്ഷകള്‍ ഒരുമിച്ച് അനുഭവിച്ചാല്‍ മതി. സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. ജോര്‍ജ് ബോബനാണ് പ്രോസിക്യൂഷന് വേണ്ടി ഹാജരായത്. ശിക്ഷാവിധിയില്‍ തൃപ്തനാണെന്ന് അദ്ദേഹം പറഞ്ഞു. കോടതിവിധി അംഗീകരിക്കുന്നതായും എന്നാല്‍ മേല്‍ കോടതിയില്‍ അപ്പീല്‍ നല്‍കാന്‍ പ്രതിക്ക് അവസരമുണ്ടെന്നും അപ്പീലിന് പോകുമെന്നും പ്രതിഭാഗം വക്കീല്‍ അഡ്വ. ഷെല്‍ജി തോമസ് പറഞ്ഞു. സതീഷ് ബാബുവിനെ ഇന്നലെത്തന്നെ തിരുവനന്തപുരം സെന്‍ട്രല്‍ ജയിലിലേക്കു കൊണ്ടുപോയി. മറ്റൊരു കേസില്‍ ശിക്ഷിക്കപ്പെട്ട് ഇയാള്‍ അവിടെ തടവില്‍ കഴിയുകയായിരുന്നു. ശിക്ഷാവിധി കേള്‍ക്കാന്‍ സിസ്റ്റര്‍ അമലയുടെ ബന്ധുക്കളും മഠത്തില്‍ നിന്നു സിസ്റ്റേഴ്‌സും കോടതിയിലെത്തിയിരുന്നു.
2015 സെപ്റ്റംബര്‍ 16ന് അര്‍ധരാത്രിയാണ് മഠത്തിലെ മുറിയില്‍ സിസ്റ്റര്‍ അമല കൊലചെയ്യപ്പെട്ടത്.