കോഴിക്കോട്: എരഞ്ഞിക്കല്‍ പ്രദേശത്തു പുഴ കൈയേറാനുള്ള ശ്രമത്തിന്റെ ഭാഗമായി വ്യാപകമായി കണ്ടല്‍ക്കാടുകള്‍ നശിപ്പിക്കുന്നതായി പരാതി. പൂനൂര്‍ പുഴയുടെ തീരത്ത് എരഞ്ഞിക്കല്‍ മേത്തലയില്‍ ക്ഷേത്രത്തിനു സമീപത്തായാണ് 25 സെന്റോളം സ്ഥലത്ത് ജെ.സി.ബി ഉപയോഗിച്ചു കണ്ടലുകള്‍ നശിപ്പിച്ചത്.
ഇവിടെ സ്വകാര്യ വ്യക്തി വീട് നിര്‍മിച്ചതിനു പിന്‍ഭാഗത്താണു കൈയേറ്റം നടന്നത്. എരഞ്ഞിക്കലില്‍ ഏക്കര്‍കണക്കിനു സ്ഥലത്തു കണ്ടല്‍ച്ചെടികളുണ്ട്. ഇതു കണ്ടല്‍സംരക്ഷണ മേഖലയില്‍പെടുന്നതുമാണ്. വീടെടുക്കാന്‍ അഞ്ച് സെന്റ് സ്ഥലം കോര്‍പറേഷന്‍ അംഗീകാരത്തോടെ നികത്തുകയായിരുന്നെന്നാണ് ഉടമയുടെ വിശദീകരണം. എന്നാല്‍, 25 സെന്റോളം സ്ഥലത്തെ കണ്ടലുകള്‍ വെട്ടിനശിപ്പിച്ചു നികത്തിയതായി നാട്ടുകാര്‍ പറയുന്നു.