കൊച്ചി: പിറവം, വരിക്കോലി, കട്ടച്ചിറ സെന്റ് മേരിസ് പള്ളികളില്‍ ആരാധന നടത്താന്‍ പൊലിസ് സംരക്ഷണം ആവശ്യപ്പെട്ട് സമര്‍പ്പിച്ച ഹരജി പരിഗണിക്കുന്നതില്‍നിന്ന് ഹൈക്കോടതിയിലെ രണ്ടാമത്തെ ബെഞ്ചും പിന്മാറി. ജസ്റ്റിസ് വി. ചിദംബരേഷ്, നാരായണ പിഷാരടി എന്നിവരടങ്ങിയ ബെഞ്ചാണ് പിന്മാറിയത്. ജസ്റ്റിസ് വി. ചിദംബരേഷ് യാക്കോബായ വിഭാഗത്തിന് വേണ്ടി ഹാജരായെന്ന് ചൂണ്ടിക്കാട്ടിയാണ് പിന്മാറ്റം. മുന്‍പ് കേസ് പരിഗണിച്ചിരുന്ന ജസ്റ്റിസ് പി.ആര്‍ രാമചന്ദ്രമേനോന്‍, ജസ്റ്റിസ് ദേവന്‍ രാമചന്ദ്രന്‍ എന്നിവര്‍ പിന്‍മാറിയതിനെ തുടര്‍ന്നാണ് നിലവിലുള്ള ബെഞ്ചിലേക്കെത്തിയത്.
രണ്ടാമതും പരിഗണിക്കുന്നതില്‍നിന്നു പിന്‍മാറിയതിനെ തുടര്‍ന്നു കേസ് ചീഫ് ജസ്റ്റിസിന്റെ പരിഗണനയ്ക്കയച്ചു. ഒത്തുതീര്‍പ്പിലൂടെ പ്രശ്‌നം പരിഹരിച്ചില്ലെങ്കില്‍ മലങ്കര സഭാതര്‍ക്കം നിലനില്‍ക്കുന്ന മറ്റു ഭാഗങ്ങളിലേക്ക് വ്യാപിക്കുമെന്ന് സര്‍ക്കാര്‍ നേരത്തെ കോടതിയെ അറിയിച്ചിരുന്നു. കേസിന് സവിശേഷമായ സ്വഭാവമുണ്ടെന്നാണ് സര്‍ക്കാര്‍ നിലപാട്. ഹരജി പരിഗണിച്ച ഡിവിഷന്‍ ബെഞ്ച് പിന്‍മാറിയതിനെ തുടര്‍ന്ന് പുതിയ ബെഞ്ചിലാണ് ഹരജിയെത്തുക.