ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റി ഇന്നിറങ്ങുന്നു. ഇന്ന് രാത്രി 8.30ന് ക്രിസ്റ്റല്‍ പാലസുമായിട്ടാണ് സിറ്റി കൊമ്പുകോര്‍ക്കുന്നത്. ഒന്നാം സ്ഥാനത്തുള്ള ലിവര്‍പൂളുമായി ഒരു പോയിന്റിന്റെ വിത്യാസം മാത്രമേ സിറ്റിക്കുള്ളു. മികച്ച ഫോമിലുള്ള സിറ്റിയും ലിവര്‍പൂളും തമ്മില്‍ പോരാട്ടം മുറുകുന്ന അവസ്ഥാണ്. പരുക്കേറ്റ് പുറത്തായിരുന്ന കെവിന്‍ ഡിബ്രുയിന്‍ മധ്യനിരയില്‍ തിരിച്ചെത്തിയത് സിറ്റിക്ക് കരുത്താകും. തിരിച്ചെത്തിയ ശേഷം കഴിഞ്ഞ ദിവസം നടന്ന ഇ.എഫ്.എല്‍ കപ്പില്‍ ലെസ്റ്ററിനെതിരേ സിറ്റിക്കായി ഡിബ്രുയിന്‍ ഗോള്‍ നേടിയിരുന്നു.
മൂന്ന്, നാല്, അഞ്ച് സ്ഥാനങ്ങളിലുള്ള ടോട്ടനം, ചെല്‍സി, ആഴ്‌സനല്‍ ടീമുകളും ഒന്നും രണ്ടും സ്ഥാനക്കാര്‍ക്ക് ഭീഷണിയാണ്. കഴിഞ്ഞ വര്‍ഷം 100 പോയിന്റുമായി ചാംപ്യന്‍മാരായ സിറ്റിക്ക് കിരീടം നിലനിര്‍ത്തണമെങ്കില്‍ വിയര്‍ക്കേണ്ടി വരും. വൈകിട്ട് ആറിന് നടക്കുന്ന മത്സരത്തില്‍ ആഴ്‌സനല്‍ ബേണ്‍ലിയെ നേരിടും. രാത്രി 8.30ന് ഹഡര്‍ഫീല്‍ഡ് സതാംപ്ടണെ നേരിടുമ്പോള്‍ അതേ സമയത്ത് തന്നെ ബേണ്‍മൗത്തും ബ്രൈട്ടനും തമ്മില്‍ ഏറ്റുമുട്ടും. 8.30ന് തന്നെ ചെല്‍സി ലെസ്റ്റര്‍ സിറ്റിയുമായി പോരടിക്കും. ചെല്‍സിക്ക് ഇന്ന് ജയിക്കാനായാല്‍ ഒരു സ്ഥാനം മെച്ചപ്പെടുത്താം. രാത്രി 11 ന് മാഞ്ചസ്റ്റര്‍ യുനൈറ്റഡ് കാര്‍ഡിഫ് സിറ്റിയെ നേരിടും. മൗറീഞ്ഞോക്ക് പകരക്കാരനായി എത്തിയ ഓലക്ക് കീഴില്‍ ഇറങ്ങുന്ന യുനൈറ്റഡിന്റെ കളിയില്‍ എന്ത് മാറ്റമാണ് സംഭവിക്കുകയെന്ന് ഇന്ന് വ്യക്തമാകും.
ആറാം സ്ഥാനത്തുള്ള യുനൈറ്റഡിന് വിജയിച്ചേ മതിയാകൂ. ശക്തമായ മുന്നേറ്റം നടത്താനാവില്ലെങ്കിലും ഒന്നോ രണ്ടോ സ്ഥാനങ്ങള്‍ മെച്ചപ്പെടുത്തിയാല്‍ അതും വലിയ നേട്ടമാകുമെന്ന കണക്കുകൂട്ടലിലാണ് യുനൈറ്റഡ്.