കോവളം: കോവളത്ത് കടലില്‍ കുളിക്കവെ കടല്‍ക്ഷോഭത്തില്‍പെട്ട രണ്ടുപേരെ സര്‍ഫിങ് പരിശീലകനും ലൈഫ് ഗാര്‍ഡുകളും രക്ഷപ്പെടുത്തി. ആലുവ സ്വദേശിയും ആര്‍മി ഉദ്യോഗസ്ഥനുമായ ആകാശ് മേനോന്‍ (35), ടെക്‌നോപാര്‍ക്ക് ജീവനക്കാരനും പാലക്കാട് സ്വദേശിയുമായ ടോമി മാത്യൂ (39) എന്നിവരാണ് ലൈഫ് ഗാര്‍ഡുമാരുടെ അവസരോചിതമായ ഇടപെടലിലൂടെ തിരച്ചുഴിയില്‍ നിന്ന് കഷ്ടിച്ച് രക്ഷപ്പെട്ടത്.  ഇന്നലെ വൈകിട്ട് ആറോടെ കോവളം ലൈറ്റ് ഹൗസ് ബീച്ചിലായിരുന്നു സംഭവം. കുടുംബത്തോടൊപ്പം കോവളം കാണാനെത്തിയ ഇരുവരും കടലിന്റെ അപകടക്കെണിയറിയാതെ കുളിക്കാനിറങ്ങിയതായിരുന്നു. പെട്ടെന്നെത്തിയ ശക്തമായ തിര ഇവരെ ലൈറ്റ്ഹൗസിന് സമീപത്തെ പാറകള്‍ നിറഞ്ഞ ഉള്‍ക്കടലിലേക്ക് വലിച്ചുകൊണ്ടു പോയി.
നീന്താനറിയാതെ വെള്ളം കുടിച്ച് താഴാറായ ടോമി മാത്യുവിനെ സര്‍ഫിങ് അധ്യാപകനായ കണ്ണപ്പനാണ് രക്ഷകനായത്. സര്‍ഫിങ് പരിശീലനത്തിലായിരുന്ന ഇയാള്‍ ലൈഫ്ഗാര്‍ഡുമാരുടെ വിസിലടി ശബ്ദം കേട്ടാണ് കൈകളുയര്‍ത്തി രക്ഷക്കായി അപേക്ഷിച്ച ടോമിയെ വലിച്ച് സര്‍ഫിങ് ബോര്‍ഡില്‍ കയറ്റി രക്ഷിച്ചത്. ഇതിനിടയില്‍ പാഞ്ഞെത്തിയ സൂപ്പര്‍വൈസര്‍ വേണുവിന്റെ നേതൃത്വത്തില്‍ ലൈഫ് ഗാര്‍ഡുമാരായ ബി. ബാബു, എം.വി ജയന്‍, റോബിന്‍സണ്‍, കെ. അനില്‍കുമാര്‍ എന്നിവര്‍ ചേര്‍ന്ന് ആകാശ് മേനോനെയും രക്ഷപ്പെടുത്തി കരയില്‍ എത്തിച്ചു. ഇരുവരും രക്ഷാപ്രവര്‍ത്തകര്‍ക്ക് നന്ദിയറിയിച്ചാണ് മടങ്ങിയത്.