കൊച്ചി: കേരള ഒളിംപിക് അസോസിയേഷന്‍ (കെ.ഒ.എ) പുതിയ ഭരണ സമിതിയിലേക്കുള്ള തിരഞ്ഞെടുപ്പ് ജനുവരി 14ന് നടത്തുമെന്ന് ഇലക്ഷന്‍ കമ്മിഷനറും റിട്ട. ജഡ്ജുമായ സുന്ദരം ഗോവിന്ദ് വാര്‍ത്താസമ്മേളനത്തില്‍ അറിയിച്ചു. സര്‍ക്കാര്‍ സംവിധാനങ്ങള്‍ ഉപയോഗിച്ച് വഴിവിട്ട നീക്കത്തിലൂടെ അസോസിയേഷന്‍ ഭരണം പിടിച്ചെടുക്കാനുള്ള സി.പി.എം നീക്കത്തെ തുടര്‍ന്ന് കഴിഞ്ഞ നവംബര്‍ 20ന് നിശ്ചയിച്ചിരുന്ന തിരഞ്ഞെടുപ്പ് ഇന്ത്യന്‍ ഒളിംപിക് അസോസിയേഷന്‍ (ഐ.ഒ.എ) റദ്ദാക്കിയിരുന്നു. തിരഞ്ഞെടുപ്പുമായി ബന്ധപ്പെട്ട് അഡ്‌ഹോക് കമ്മിറ്റിക്ക് നിരവധി പരാതികളാണ് ലഭിച്ചത്. തിരഞ്ഞെടുപ്പിന് മുന്നോടിയായി സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ കായിക അസോസിയേഷനുകളുടെ യോഗം വിളിച്ചുകൂട്ടി സി.പി.എം പാനല്‍ അവതരിപ്പിച്ച് വോട്ട് അഭ്യര്‍ഥിച്ചത് വിവാദമായിരുന്നു. ഒളിംപിക് അസോസിയേഷന്‍ തിരഞ്ഞെടുപ്പില്‍ സര്‍ക്കാര്‍, രാഷ്ട്രീയ തലത്തില്‍ ഇടപെടലുകള്‍ ഉണ്ടാകുന്നത് ഒളിംപിക് ചാര്‍ട്ടറിന് എതിരാണ്. ഒളിംപിക് ചാര്‍ട്ടര്‍ ലംഘിച്ചുള്ള തിരഞ്ഞെടുപ്പ് അംഗീകരിക്കാനാവില്ലെന്നായിരുന്നു ഐ.ഒ.എ നിലപാട്.
ഇതേ തുടര്‍ന്നാണ് ഹൈക്കോടതി ഉത്തരവ് പ്രകാരം ഇലക്ഷന്‍ കമ്മിഷനര്‍ പുതിയ തിരഞ്ഞെടുപ്പ് തിയതി പ്രഖ്യാപിച്ചത്. രാവിലെ 10 മുതല്‍ ഉച്ചക്ക് രണ്ടു വരെയാണ് വോട്ടെടുപ്പ്. വൈകിട്ട് ആറോടെ ഫലം പ്രഖ്യാപിക്കും. തിരഞ്ഞെടുപ്പ് നടക്കുന്ന സ്ഥലം പിന്നീട് അറിയിക്കും. മെംബര്‍ അസോസിയേഷനുകളുടെ കരട് പട്ടിക ഇന്ന് പ്രസിദ്ദീകരിക്കും. 27 ന് ഇലക്ഷന്‍ കമ്മിഷനറുടെ നേതൃത്വത്തില്‍ പരാതികള്‍ പരിഗണിക്കുന്നതിനും വോട്ടര്‍പട്ടിക അന്തിമപ്പെടുത്തുന്നതിനും അംഗീകൃത സ്‌പോര്‍ട്‌സ് അസോസിയേഷനുകളെ പങ്കെടുപ്പിച്ചുള്ള യോഗം നടക്കും. 30 ന് ആണ് വോട്ടര്‍ പട്ടിക പ്രസിദ്ധീകരിക്കുക. 31 മുതല്‍ ജനുവരി മൂന്നു വരെ നാമനിര്‍ദേശ പത്രിക സമര്‍പ്പിക്കാം. ഒന്‍പതിന് അന്തിമ സ്ഥാനാര്‍ഥി പട്ടിക പ്രസിദ്ധീകരിക്കും. നിലവില്‍ 26 അസോസിയേഷനുകള്‍ക്കാണ് വോട്ടെടുപ്പില്‍ പങ്കെടുക്കാന്‍ അവകാശമുള്ളതെന്ന് കേരള ഒളിംപിക് അസോസിയേഷന്‍ അഡ്‌ഹോക് കമ്മിറ്റി അധ്യക്ഷ മറിയാമ്മ കോശി പറഞ്ഞു. ഓരോ അസോസിയേഷനും മൂന്നു വോട്ടുകള്‍ വീതമുണ്ടാവും. കോടതി ഉത്തരവ് പ്രകാരം ടേബിള്‍ ടെന്നിസ് അസോസിയേഷനുമായി ബന്ധപ്പെട്ട് പ്രവര്‍ത്തിക്കുന്ന കേരള ടേബിള്‍ ടെന്നിസ് അസോസിയേഷനും ടേബിള്‍ ടെന്നിസ് അസോസിയേഷന്‍ ഓഫ് കേരളക്കും വോട്ടവകാശമുണ്ട്. പ്രസിഡന്റ്, സെക്രട്ടറി, ട്രഷറര്‍, അഞ്ചു വൈസ് പ്രസിഡന്റുമാര്‍, രണ്ടു ജോയിന്റ് സെക്രട്ടറിമാര്‍, അഞ്ചു എക്‌സിക്യൂട്ടീവ് അംഗങ്ങള്‍ ഉള്‍പ്പെടെ 20 സീറ്റുകളിലേക്കാണ് വോട്ടെടുപ്പ്.
ഒളിംപിക് അസോസിയേഷനില്‍ കഴിഞ്ഞ വര്‍ഷം നടക്കേണ്ട തിരഞ്ഞെടുപ്പാണ് വലിയ ഇടവേളക്ക് ശേഷം അടുത്ത വര്‍ഷം ജനുവരി 14 ന് നടത്തുന്നത്. 2013ല്‍ തിരഞ്ഞെടുക്കപ്പെട്ട ഭരണ സമിതിയുടെ കാലാവധി 2017 ല്‍ അവസാനിച്ചിരുന്നു. നാലു വര്‍ഷത്തെ കാലാവധി കഴിഞ്ഞിട്ടും കൃത്യസമയത്ത് തിരഞ്ഞെടുപ്പു നടത്താത്തതിന്റെ പേരില്‍ കേരള ഒളിംപിക് അസോസിയേഷനെ ഇന്ത്യന്‍ ഒളിംപിക് അസോസിയേഷന്‍ സസ്‌പെന്‍ഡ് ചെയ്തു. തുടര്‍ന്ന് കേരള ഹോക്കി അസോസിയേഷന്‍ ചെയര്‍പേഴ്‌സണ്‍ മറിയാമ്മ കോശിയുടെ നേതൃത്വത്തില്‍ അഡ്‌ഹോക് കമ്മിറ്റിയെ ചുമതലപ്പെടുത്തി. കഴിഞ്ഞ ഫെബ്രുവരി മുതല്‍ അഡ്‌ഹോക് കമ്മിറ്റിയാണ് അസോസിയേഷന്റെ പ്രവര്‍ത്തനങ്ങള്‍ നിയന്ത്രിക്കുന്നത്.