നിലമ്പൂര്‍: മാനസിക വിഭ്രാന്തിയില്‍ കണ്ട ഇതരസംസ്ഥാന യുവതിയെ പൊലിസും മഹിള സമഖ്യ പ്രവര്‍ത്തകരും ചേര്‍ന്ന് പൂക്കോട്ടൂരിലെ സ്‌നേഹതിയിലേക്ക് കൊണ്ടു പോയി. ഡല്‍ഹി സ്വദേശിനിയാണെന്നാണ് പ്രാഥമിക നിഗമനം. രണ്ടു ദിവസം മുന്‍പ് ചന്തക്കുന്നിലെത്തിയ അവശയായ 40വയസുള്ള യുവതിക്ക് നാട്ടുകാരാണ് ഭക്ഷണം നല്‍കിയത്.
ഡല്‍ഹിയില്‍ നിന്നും നടന്നാണ് വന്നതെന്നും ഹോസ്പിറ്റല്‍പ്യാരിയിലെ ഷിയൂലിറാണി പോളാണ് പേരെന്നും പിതാവ് ദയാല്‍ ചന്ദ്രപോളാണെന്നും യുവതി പറഞ്ഞു. വനിതാ എസ്.ഐ ഏലിയാമ്മയുടെ നേതൃത്വത്തിലാണ് ഇവരെ സ്‌നേഹിതയിലേക്ക് മാറ്റിയത്. ഇതരസംസ്ഥാനങ്ങളില്‍ നിന്നും മാനസിക വൈകല്യമുള്ളവരെയും വൃദ്ധരെയും വാഹനങ്ങളില്‍ കേരളത്തിലേക്ക് കടത്തുന്നുണ്ടെന്നാണ് പൊലിസിന് ലഭിച്ച വിവരം.