സുല്‍ത്താന്‍ബത്തേരി: ജില്ലയില്‍ വീണ്ടും ഡിഫ്തീരിയ റിപ്പോര്‍ട്ട് ചെയ്തു. നമ്പ്യാര്‍കുന്ന് കല്ലൂരിലെ പന്ത്രണ്ടു വയസുകാരിക്കാണ് രോഗം സ്ഥിരീകരിച്ചത്. ഇതോടെ ഈ വര്‍ഷം ഡിഫ്തീരിയ ബാധിച്ചവരുടെ എണ്ണം 17 ആയി.
രോഗലക്ഷണങ്ങളുമായി കഴിഞ്ഞ തിങ്കളാഴ്ചയാണ് ചീരാല്‍ പ്രാഥമികാരോഗ്യ കേന്ദ്രത്തില്‍ കുട്ടി ചികിത്സ തേടിയെത്തിയത്. ഇവരെ അന്നുതന്നെ ബത്തേരി താലൂക്ക് ആശുപത്രിയിലെത്തിച്ച് പി.സി.ആര്‍, സ്വാബ് കള്‍ച്ചര്‍ ശേഖരിച്ച് പരിശോധനക്കായി അയച്ചിരുന്നു. വ്യാഴാഴ്ച വൈകിട്ടാണ് രോഗബാധ സ്ഥിരീകരിച്ച് പരിശോധന ഫലം പുറത്തുവന്നത്.
പെണ്‍കുട്ടിയിപ്പോള്‍ ബത്തേരിയിലെ ഒരു സ്വകാര്യ ആശുപത്രിയില്‍ ചികിത്സയിലാണ്. ഇവരെ കോഴിക്കോട് മെഡിക്കല്‍ കോളജിലേക്ക് കൊണ്ടുപോകും. കുട്ടിയുടെ വീടിനു ചുറ്റുവട്ടത്തുള്ള പ്രദേശത്ത് ആരോഗ്യവകുപ്പ് ജീവനക്കാര്‍ പ്രതിരോധ പ്രവര്‍ത്തനങ്ങള്‍ നടത്തിയിട്ടുണ്ട്. വീട്ടുകാര്‍ക്ക് പ്രതിരോധ കുത്തിവെപ്പും മരുന്നും നല്‍കി. ചീരാല്‍ പ്രാഥമികആരോഗ്യ കേന്ദ്രത്തിന്റെ പരിധിയില്‍ രണ്ടാമത്തെ ഡിഫ്തീരിയയാണ് ഇപ്പോള്‍ റിപ്പോര്‍ട്ട് ചെയ്യുന്നത്. മുമ്പ് 14 വയസുകാരിക്കും രോഗം സ്ഥിരീകരിച്ചിരുന്നു.