കൊണ്ടോട്ടി: കരിപ്പൂര്‍ വിമാനത്താവളം വഴി കടത്താന്‍ ശ്രമിച്ച 7 ലക്ഷം രൂപയുടെ വിദേശ നിര്‍മിത സിഗരറ്റുകള്‍ കസ്റ്റംസ് ഇന്റലിജന്‍സ് വിഭാഗം പിടികൂടി. സംഭവവുമായി ബന്ധപ്പെട്ട് കാസര്‍കോട് ചേറൂര്‍ ജലാല്‍ മന്‍സില്‍ ആബൂസാലി അഹമ്മദ്(28) കാസര്‍കോട് തെക്കില്‍ ബെന്‍സിച്ചാല്‍ എയ്യാല മുഹമ്മദ് അഷ്‌റഫ് അഹമ്മദ് സുലൈമാന്‍(26)എന്നിവരെ കസ്റ്റംസ് കസ്റ്റഡിയിലെടുത്തു.
എയര്‍ ഇന്ത്യ എക്‌സ്പ്രസിന്റെ ദുബൈ വിമാനത്തിലാണ് ഇരുവരും കരിപ്പൂരിലെത്തിയത്. ഗ്രീന്‍ ചാനല്‍ വഴി പുറത്തുകടക്കാന്‍ തുടങ്ങിയ ഇവരെ ഇന്റലിജന്‍സ് വിഭാഗം തടയുകയും ബാഗേജ് തുറന്ന് പരിശോധിക്കുകയുമായിരുന്നു. പരിശോധയില്‍ വസ്ത്രങ്ങള്‍ക്കകത്ത് ഒളിപ്പിച്ച നിലയില്‍ സിഗരറ്റുകള്‍ കണ്ടെത്തുകയായിരുന്നു.
24,400 വീതം സിഗരറ്റുകളാണ് ഇവരില്‍ നിന്ന് കണ്ടെത്തിയത്. ഇവര്‍ കള്ളക്കടത്തു സംഘത്തിന്റെ കാരിയര്‍മാരാണെന്ന് കരുതുന്നു. വ്യാഴാഴ്ചയാണ് ഇരുവരും കരിപ്പൂരില്‍ നിന്ന് ദുബൈയിലേക്ക് പോയത്. ഒരു ദിവസത്തിനുള്ളില്‍ തന്നെ മടങ്ങിയതാണ് കസ്റ്റംസ് വിഭാഗത്തിന് സംശയമുണ്ടാക്കിയത്. സിഗരറ്റുകള്‍ക്ക് ഇന്ത്യന്‍ വിപണിയില്‍ 7 ലക്ഷം രൂപ വിലവരും.