കാളികാവ്: മാവോവാദി നേതാവ് കന്യാകുമാരിയെ ആദിവാസികള്‍ തിരിച്ചറിഞ്ഞു. ഇവര്‍ ചോദ്യംചെയ്യലുമായി സഹകരിക്കുന്നില്ല. ചോദ്യങ്ങള്‍ക്ക് മറുപടി നല്‍കാതെ കരഞ്ഞുകൊണ്ടിരിക്കുകയാണ്. മാവോവാദി പ്രവര്‍ത്തനവുമായി ബന്ധപ്പെട്ട് എടക്കര പൊലിസ് രജിസ്റ്റര്‍ ചെയ്ത കേസില്‍ കന്യാകുമാരിയെ തിങ്കളാഴ്ച വരെ പൊലിസ് കസ്റ്റഡിയില്‍ വിട്ടു. മഞ്ചേരി ജില്ലാ പ്രിന്‍സിപ്പല്‍ സെഷന്‍സ് കോടതിയാണ് തിങ്കളാഴ്ച രാവിലെ 11 വരെ പൊലിസ് കസ്റ്റഡി അനുവദിച്ചത്.
2016 ഏപ്രില്‍ 15ന് പടുക്ക വനത്തിലെ ഈങ്ങാറില്‍ തെരഞ്ഞെടുപ്പ് ബഹിഷ്‌കരണ ആഹ്വാനം ഉള്‍പ്പെടെയുള്ള ദേശദ്രോഹപ്രവര്‍ത്തനങ്ങള്‍ നടത്തിയതിനാണ് എടക്കര പൊലിസ് കേസെടുത്തിരുന്നത്. രാജ്യദ്രോഹ പ്രവര്‍ത്തനം ഉള്‍പ്പെടെ 10 വകുപ്പുകളാണ് ഇവര്‍ക്കെതിരേ ചുമത്തിയിരിക്കുന്നത്. കന്യാകുമാരിയില്‍നിന്ന് മാവോവാദി പശ്ചിമഘട്ട മേഖലാ കമ്മിറ്റിയുടെ രഹസ്യവിവരങ്ങള്‍ ലഭിക്കുമെന്നാണ് പൊലിസ് കരുതുന്നത്.
2016 നവംബര്‍ 24ന് വരയന്‍ മലയില്‍ ഏറ്റുമുട്ടലുണ്ടായപ്പോള്‍ മാവോവാദി ക്യാംപില്‍ ആരെല്ലാമാണ് ഉണ്ടായിരുന്നതെന്ന് കന്യാകുമാരിയില്‍നിന്ന് അറിയാനുള്ള ശ്രമവും പൊലിസ് നടത്തുന്നുണ്ട്.
ആറുമാസം പ്രായമുള്ള കുഞ്ഞ് കൂടി കന്യാകുമാരിയുടെ കൂടെയുണ്ട്. മാവോവാദികളുടെ കേരളം, തമിഴ്‌നാട്, കര്‍ണാടക സംസ്ഥാനങ്ങള്‍ ഉള്‍പ്പെടുന്ന പശ്ചിമഘട്ട മേഖലാ കമ്മിറ്റിയുടെ ചുമതല കന്യാകുമാരി നേരത്തേ വഹിച്ചിരുന്നു. നിലമ്പൂര്‍, തമിഴ്‌നാട് മേഖലയെ ബന്ധിപ്പിക്കുന്ന നാടുകാണി ദളത്തിലും അട്ടപ്പാടി, കോയമ്പത്തൂര്‍ മേഖലയെ ബന്ധിപ്പിക്കുന്ന ഭവാനി ദളത്തിലും വയനാടിനെ കര്‍ണാടകയുമായി ബന്ധിപ്പിക്കുന്ന കബനി ദളത്തിലും കന്യാകുമാരി പ്രവര്‍ത്തിച്ചതായി റിപ്പോര്‍ട്ടുണ്ട്.