പട്ടാമ്പി: തുലാമഴ ലഭിക്കാതെ രണ്ടാംവിള ഉണക്കുഭീഷണിയിലാകുന്നത് തടയാന്‍ നടപടിയെടുക്കുമെന്ന് ജലസേചനവകുപ്പ് അധികൃതര്‍. പ്രളയത്തെത്തുടര്‍ന്ന് കവളപ്പാറ ജലസേചനപദ്ധതിയുടെ മോട്ടോര്‍ വെള്ളം കയറി തകരാറിലാണ്. ഇതിന്റെ അറ്റകുറ്റപ്പണി പൂര്‍ത്തിയാക്കി അടുത്തയാഴ്ചമുതല്‍ വെള്ളം നല്‍കുമെന്ന് അസി. എന്‍ജിനീയര്‍ എം.വി ദിലീപ് അറിയിച്ചു. കൃഷിക്കാവശ്യമായ വെള്ളം ലഭിക്കാത്ത പ്രശ്‌നം ഇതോടെ പരിഹരിക്കപ്പെടുമെന്നാണ് പ്രതീക്ഷ. ഇവിടെ വെള്ളമെത്തിച്ചിരുന്നത് പരുത്തിപ്ര മേഖലയില്‍ കണ്ണംപാറ പദ്ധതിയില്‍നിന്നായിരുന്നു.
വെള്ളമെത്തുന്ന കനാല്‍ തകരാറിലായതാണ് പ്രശ്‌നമായത്. കനാല്‍ അറ്റകുറ്റപ്പണി നടത്താന്‍ അടങ്കല്‍ തയാറാക്കി സമര്‍പ്പിച്ചിട്ടുണ്ടെന്നും അസി. എന്‍ജിനീയര്‍ പറഞ്ഞു. പരുത്തിപ്ര, കണയം, ചുഡുവാലത്തൂര്‍, കവളപ്പാറ, കാരേക്കാട് മേഖലയിലാണ് കൂടുതല്‍ നെല്‍ക്കൃഷിയുള്ളത്. കണയം മേഖലയില്‍ ജലസേചനപദ്ധതികളൊന്നുമില്ലാത്തതാണ് ഇവിടെയുള്ള കര്‍ഷകര്‍ക്ക് വെള്ളം ലഭിക്കാതിരിക്കാനുള്ള കാരണം. വെള്ളം ലഭിക്കാവുന്ന സംവിധാനങ്ങളുണ്ടെങ്കില്‍ പദ്ധതിയാരംഭിക്കാമെന്നും ജലസേചനവകുപ്പ് അധികൃതര്‍ പറയുന്നു.
650 ഏക്കറോളം നെല്‍ക്കൃഷി ചെയ്ത കര്‍ഷകരാണ് ഷൊര്‍ണൂര്‍ മേഖലയില്‍മാത്രം വെള്ളമില്ലാതെ വലയുന്നത്. രാത്രിപോലും കൃഷിസ്ഥലത്തേക്ക് വെള്ളമെത്തിക്കാനുള്ള ശ്രമം നടത്തുന്നുണ്ടെങ്കിലും കൃഷി ഉണങ്ങുകയാണ്. പലരും സൗകര്യങ്ങള്‍ക്കനുസരിച്ച് വെള്ളം മോട്ടോറടിച്ച് എത്തിക്കാനുള്ള ശ്രമവും നടത്തുന്നുണ്ടെങ്കിലും എല്ലാ കര്‍ഷകര്‍ക്കും എത്തിക്കാനാവുന്നില്ലെന്ന് കര്‍ഷകര്‍ പറയുന്നു.