കൂറ്റനാട്: ആറങ്ങോട്ടുകര റോഡില്‍ തിരുമിറ്റക്കോട് അമ്പലം സ്റ്റോപ്പിനു സമീപം സ്‌കൂട്ടര്‍ യാത്രക്കാരനെ നടുറോഡില്‍ അക്രമികള്‍ വെട്ടിവീഴ്ത്തി. വെള്ളിയാഴ്ച രാവിലെ 9.30ഓടെയാണ് നാടിനെ നടുക്കിയ സംഭവം.
കൂട്ടുപാതയിലെ സ്വകാര്യ പണമിടപാട് സ്ഥാപനത്തിലെ ജീവനക്കാരനായ മനോജ് ജോലിക്കായി ദേശമംഗലത്ത് നിന്നും സ്‌കൂട്ടറില്‍ വരുമ്പോഴാണ് പിന്തുടര്‍ന്നെത്തിയവര്‍ വെട്ടിവീഴ്ത്തിയത്. സ്‌കൂട്ടറിന്റെ മുന്നിലും പിന്നിലുമായി ബൈക്കില്‍ എത്തിയവര്‍ മനോജിന്റെ കയ്യിലും കാലിലും വെട്ടി പരുക്കേല്‍പ്പിച്ചു. സംഭവം കണ്ട് മറ്റുവണ്ടിക്കാര്‍ എത്തിയതോടെ അക്രമികള്‍ ബൈക്കുമായി രക്ഷപ്പെട്ടു.
ആറങ്ങോട്ടുകര ഭാഗത്തേക്കാണ് പ്രതികള്‍ രക്ഷപ്പെട്ടതെന്ന് ദൃക്‌സാക്ഷികള്‍ പറഞ്ഞു. റോഡില്‍ വീണ മനോജിനെ നാട്ടുകാര്‍ കാറില്‍ കയറ്റി ആശുപത്രിയിലെത്തിച്ചു. നേരത്തെ നടന്ന ഒരു അപകടത്തില്‍ മനോജിന്റെ വലതു കൈപത്തി നഷ്ടപ്പെട്ടിരുന്നു. ഗുരുതര പരുക്ക് പറ്റിയ മനോജിനെ ആദ്യം കുന്നംകുളത്തെ ആശുപത്രിയിലും പിന്നീട് തൃശൂര്‍ അശ്വനി ഹോസ്പിറ്റലിലും പ്രവേശിപ്പിച്ചു. ചാലിശ്ശേരി പൊലിസ് കേസെടുത്ത് അന്വേഷണം ആരംഭിച്ചു.