റിയാദ്: യമനിൽ സഊദി സഖ്യ സേനയുടെ നേതൃത്വത്തിൽ നടക്കുന്ന കുഴിബോംബ് നിർവീര്യമാക്കൽ പദ്ധതിയിൽ ഇതുവരെ നീക്കം ചെയ്തത് കാൽ ലക്ഷത്തിലധികം കുഴിബോംബുകൾ. കിംഗ് സൽമാൻ ഹ്യുമാനിറ്റേറിയൻ എയിഡ് ആൻഡ് റിലീഫ് സെന്ററിന്റെ നേതൃത്വത്തിലുള്ള സംഘമാണ് സർക്കാർ സൈന്യത്തെ പ്രതിരോധിക്കാനായി വിമതർ വിതറിയ കുഴിബോംബുകൾ കണ്ടെത്തി നിർവീര്യമാക്കുന്നത്. ഇതിനകം 26,609 മൈനുകൾ നിർവ്വീര്യമാക്കിയതായി കെ എസ് റിലീഫ് സംഘം അറിയിച്ചു. ഈ മാസം മാത്രം മുവ്വായിരത്തോളം മൈനുകൾ കണ്ടെത്തി നശിപ്പിച്ചിട്ടുണ്ട്. 

 

ഇറാൻ സഹായത്തോടെ പ്രവർത്തിക്കുന്ന വിമത വിഭാഗമായ ഹൂതി മലീഷികളാണ് ഔദ്യോഗിക സർക്കാരിനെ പ്രതിരോധിക്കാനായി വ്യാപകമായി കുഴിബോംബുകൾ വിതറിയത്. നവംബറിൽ വിദ്യാലയങ്ങളും ജന വാസ കേന്ദ്രങ്ങളും ലക്ഷ്യമാക്കി ഹൂതികൾ നിക്ഷേപിച്ച ഏഴായിരത്തോളം കുഴിബോംബുകൾ നിർവീര്യമാക്കിയതായി സൈന്യം അറിയിച്ചു. വിവിധ മാർഗ്ഗങ്ങൾ ഉപയോഗിച്ച് ദൃഷ്ടികളിൽ നിന്നും അപ്രത്യക്ഷമാക്കി ഒളിപ്പിച്ചു വെക്കുന്ന കുഴിബോംബുകൾ പൊട്ടി സ്ത്രീകളും കുട്ടികളും വൃദ്ധരുമടക്കം നിരവധി പേർ കൊല്ലപ്പെട്ടതായി സൈന്യത്തെ ഉദ്ധരിച്ചു മാധ്യമങ്ങൾ റിപ്പോർട്ട് ചെയ്തു.