പത്തനംതിട്ട: മല കയറാനെത്തിയ യുവതികള്‍ നക്‌സലുകളാണോയെന്നു സംശയമുള്ളതായി പന്തളം കൊട്ടാരം പ്രതിനിധി ശശികുമാര വര്‍മ. സുരക്ഷ നല്‍കിയ സര്‍ക്കാര്‍ നിലപാട് സംശയാസ്പദമാണ്. തങ്ക അങ്കി ഘോഷയാത്ര തുടങ്ങിയ ദിവസം തന്നെ ഇവര്‍ എത്തിയത് ദുരൂഹമാണ്. ഇതിനു പിന്നില്‍ ചടങ്ങിന്റെ പവിത്രത കെടുത്താനുള്ള ഗൂഢാലോചന ഉണ്ടോയെന്ന് സംശയിക്കുന്നതായും ശശികുമാര വര്‍മ ആരോപിച്ചു. ഇവര്‍ ആചാരം പാലിച്ചാണോ എത്തിയതെന്ന് പരിശോധിക്കണം.
ആചാരലംഘനമുണ്ടായാല്‍ തന്ത്രിയുമായി കൂടിയാലോചിച്ച് തുടര്‍നടപടികള്‍ സ്വീകരിക്കും. ശബരിമലയിലെ ആചാരങ്ങളെ സംബന്ധിച്ചുള്ള അന്തിമവാക്ക് തന്ത്രിയുടേതാണ്. ആചാരങ്ങളെ സംബന്ധിച്ച് തന്ത്രി കുടുംബവും പന്തളം കൊട്ടാരവും വളരെ ഐക്യത്തോടെയാണ് നീങ്ങുന്നത്. ശബരിമലയില്‍ പ്രവേശിക്കാനായി നേരത്തെയും യുവതികള്‍ വന്നിരുന്നു. അന്നും ഇതിനെക്കുറിച്ച് പന്തളം കൊട്ടാരവും തന്ത്രി കുടുംബവും ചര്‍ച്ച ചെയ്തിരുന്നു. നിലവിലെ സാഹചര്യത്തെക്കുറിച്ചും തന്ത്രി കുടുംബവുമായി ചര്‍ച്ച ചെയ്തിട്ടുണ്ടെന്നും ശശികുമാര വര്‍മ്മ പറഞ്ഞു.