തിരുവനന്തപുരം: എല്ലാ താലൂക്ക് ആശുപത്രികളിലും ഡയാലിസിസ് സംവിധാനമൊരുക്കാന്‍ ആരോഗ്യവകുപ്പൊരുങ്ങുന്നു. ആര്‍ദ്രം മിഷന്റെ 2018-19 വര്‍ഷത്തെ പദ്ധതിപ്രകാരം സംസ്ഥാനത്തെ ഓരോ ജില്ലകളിലും രണ്ട് വീതം താലൂക്കാശുപത്രികള്‍ തെരഞ്ഞെടുത്ത് പദ്ധതിയുടെ പ്രാരംഭ നടപടികള്‍ തുടങ്ങിക്കഴിഞ്ഞു. സംസ്ഥാനത്തെ 28 താലൂക്കാശുപത്രികളില്‍ ഇതോടെ ഡയാലിസിസ് സംവിധാനം നിലവില്‍ വരും.
ഇതിന് പുറമെ താലൂക്ക് ആശുപത്രികളിലെ അത്യാഹിത വിഭാഗം ശക്തിപ്പെടുത്താനും അടിസ്ഥാന സ്‌പെഷാലിറ്റികളായ മെഡിസിന്‍, സര്‍ജറി, ഗൈനക്കോളജി, ശിശുരോഗവിഭാഗം, അസ്ഥിരോഗവിഭാഗം, ഇ.എന്‍.ടി, നേത്രരോഗവിഭാഗം, അനസ്തീഷ്യവിഭാഗം, സൈക്യാട്രി, ത്വഗ്‌രോഗം, ഫിസിക്കല്‍ മെഡിസിന്‍, ദന്തരോഗവിഭാഗം എന്നിവയുടെ സേവനം ലഭ്യമാക്കാനുമുള്ള നടപടികള്‍ നടന്നുവരുന്നു. ആശുപത്രികളെ കുടുംബാരോഗ്യകേന്ദ്രമായി ഉയര്‍ത്താനുള്ള പദ്ധതി പ്രകാരം 503 സ്ഥാപനങ്ങളെ തെരഞ്ഞെടുത്ത് ഗ്യാപ് അനാലിസിസും പ്രപ്പോസല്‍ തയാറാക്കലും നടന്നുവരികയാണ്.