ഏറ്റുമാനൂര്‍: ബ്ലോക്ക് പഞ്ചായത്ത് നടപ്പാക്കുന്ന സുസ്ഥിര ശുചിത്വം പദ്ധതിയുടെ ഭാഗമായി സ്‌കൂളുകളില്‍ നടപ്പാക്കുന്ന 'വൃത്തിയുളള മുറ്റം' പ്രോജക്ട് കുമരകം ഗവ. എസ്.എല്‍.ബി സ്‌കൂളില്‍ ആരംഭിച്ചു. പ്ലാസ്റ്റിക്കിന്റെ ദൂഷ്യവശങ്ങളെക്കുറിച്ച് ജനങ്ങളെ ബോധവല്‍കരിക്കുക, പ്ലാസ്റ്റിക്കിന്റെ ഉപയോഗം കുറയ്ക്കുക, ഉപയോഗിക്കുന്ന പ്ലാസ്റ്റിക്കുകള്‍ ശാസ്ത്രീയമായി സംസ്‌കരിക്കുക തുടങ്ങിയ ഉദ്ദേശങ്ങള്‍ മുന്‍ നിര്‍ത്തിയാണ് ഏറ്റുമാനൂര്‍ ബ്ലോക്ക് ഈ പദ്ധതി നടപ്പാക്കുന്നത്.
ഇതിന്റെ ഭാഗമായി സ്‌കൂളില്‍ സ്ഥാപിച്ച വേസ്റ്റ് ബിന്‍ വഴി പ്ലാസ്റ്റിക് വേസ്റ്റ് ശേഖരിക്കുന്നതിനായുളള പദ്ധതിയാണ് ഉദ്ഘാടനം ചെയ്തത്. സ്‌കൂളിലെയും, കൂടാതെ വീടുകളില്‍ നിന്നുമുളള പ്ലാസ്റ്റികുകള്‍ വൃത്തിയാക്കിയ ശേഷം ഇതില്‍ നിക്ഷേപിക്കാവുന്നതാണ്. സ്‌കൂളുകളില്‍ സ്ഥാപിച്ച ബിന്നുകളില്‍ നിന്നും ബ്ലോക്ക് നേരിട്ട് പ്ലാസ്റ്റിക് ശേഖരിക്കും. ഇങ്ങനെ ശേഖരിക്കുന്ന പ്ലാസ്റ്റിക്ക് റീ സൈക്കിള്‍ ചെയ്ത് ഉപയോഗിക്കും. ഇതിന്റെ ഉദ്ഘാടനം ബ്ലോക്ക് പഞ്ചായത്ത് മെമ്പര്‍ കെ.എം. ബാബു ഉദ്ഘാടനം ചെയ്തു. ഷാജി ക്ലാസ് നയിച്ചു. പി.ടി.എ പ്രസിഡന്റ് അധ്യക്ഷനായ യോഗത്തില്‍ സ്‌കൂള്‍ ഹെഡ്മിസ്ട്രസ് ത്രേസ്യാമ്മ ആന്റണി സ്വാഗതംപറഞ്ഞു. പദ്ധതിയുടെ സ്‌കൂള്‍തല കോ ഓര്‍ഡിനേറ്റര്‍ ഷിഹാബ് നൈ, ജീവ, മായ  പ്രസംഗിച്ചു.