കോട്ടയം: 24 -ാമത് ദര്‍ശന അഖില കേരള ശങ്കേഴ്‌സ് ചിത്രരചനാ കര്‍ട്ടൂണ്‍ മത്സരങ്ങള്‍ ദര്‍ശന സാംസ്‌കാരിക കേന്ദ്രത്തില്‍ ഇന്നും നാളെയുമായി നടക്കും. കാര്‍ട്ടൂണിസ്റ്റ് ശങ്കറിന്റെ സ്മരണയ്ക്കായി ന്യൂഡല്‍ഹിയിലെ ചില്‍ഡ്രന്‍സ് ബുക്ക് ട്രസ്റ്റ് നടത്തുന്ന രാജ്യാന്തര ചിത്രരചനാ മത്സരങ്ങളുടെ ഭാഗമായിട്ടാണ് മത്സരങ്ങള്‍ സംഘടിപ്പിക്കുന്നത്.
    ഏഴു വിഭാഗങ്ങളിലായാണ് മത്സരം. ഇന്ന് രാവിലെ പത്തിന് നഴ്‌സറി ക്ലാസ് മുതല്‍ നാലാംക്ലാസ് വരെയുള്ള കുട്ടികളുടെ പെയിന്റിങ് മത്സരവും സ്‌പെഷല്‍ സ്‌കൂള്‍ വിദ്യാര്‍ഥികള്‍ക്കുമുള്ള പ്രത്യേക കളറിങ് മത്സരവും നടക്കും. ഉച്ചകഴിഞ്ഞ് രണ്ടിന് കാര്‍ട്ടൂണ്‍ കാരിക്കേച്ചര്‍ മത്സരങ്ങള്‍ നടക്കും. കാര്‍ട്ടൂണ്‍ മത്സരത്തില്‍ 12 -ാം ക്ലാസ് വരെയുള്ള എല്ലാ കുട്ടികള്‍ക്കും പങ്കെടുക്കാം. മുതിര്‍ന്നവര്‍ക്കായുള്ള കാരിക്കേച്ചര്‍ മത്സരത്തിന് പ്രായപരിധിയില്ല. നാളെ ഉച്ചയ്ക്കു രണ്ടിന് അഞ്ചാംക്ലാസ് മുതല്‍ പ്ലസ് ടു വരെയുള്ള വിദ്യാര്‍ഥികളുടെ പെയിന്റിങ് മത്സരം നടക്കും. ഒന്നും രണ്ടും മൂന്നും സ്ഥാനം ലഭിക്കുന്ന എല്ലാ വിഭാഗക്കാര്‍ക്കും ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റ് വക ശങ്കേഴ്‌സ് വെള്ളി മെഡലുകളും, ക്യാഷ് അവാര്‍ഡുകളും ലഭിക്കും. കൂടാതെ ദര്‍ശന സാംസ്‌കാരിക കേന്ദ്രം നല്‍കുന്ന ട്രോഫികള്‍, ഡി.സി ബുക്‌സ് നല്‍കുന്ന പത്ത് സ്‌പെഷല്‍ ട്രോഫികള്‍, ഓരോ ഗ്രൂപ്പിലും 25 പ്രോത്സാഹന സമ്മാനങ്ങള്‍ എന്നിവയും നല്‍കും.
മത്സരത്തില്‍ പങ്കുചേരുന്ന എല്ലാ കുട്ടികള്‍ക്കും സമ്മാന പായ്ക്കറ്റുകള്‍ നല്‍കും. ഏറ്റവും കൂടുതല്‍ കുട്ടികളെ പങ്കെടുപ്പിക്കുന്ന സ്‌കൂളുകള്‍ക്ക് സ്‌പെഷല്‍ അവാര്‍ഡുണ്ട്. കാരിക്കേച്ചര്‍ മത്സരത്തില്‍ ഏറ്റവും നല്ല സൃഷ്ടിക്ക് 1001 രൂപ ഒന്നാം സമ്മാനമായി ലഭിക്കും. ഇന്ന് രാവിലെ 9.30ന് നടക്കുന്ന ഉദ്ഘാടന ചടങ്ങില്‍ നഗരസഭാധ്യക്ഷ ഡോ. പി.ആര്‍ സോന അധ്യക്ഷത വഹിക്കും. തിരുവഞ്ചൂര്‍ രാധാകൃഷ്ണന്‍ എം.എല്‍.എ മത്സരങ്ങള്‍ ഉദ്ഘാടനം ചെയ്യും. കൂടുതല്‍ വിവരങ്ങള്‍ക്ക്: ദര്‍ശനാ സാംസ്‌കാരിക കേന്ദ്രം, ഫോണ്‍ - 9447008255, 0481 - 2564602, 2564755.