കോഴിക്കോട്: ശബരിമല വിഷയത്തില്‍ പൊലിസും സര്‍ക്കാരും കപടനാടകം കളിക്കുകയാണെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. ശബരിമല ദര്‍ശനത്തിന് മനിതി സംഘമെത്തിയതിന് പിന്നില്‍ ഗൂഢാലോചന നടന്നിട്ടുണ്ട്. കേരളത്തിലെയും തമിഴ്‌നാട്ടിലെയും സി.പി.എം ഘടകങ്ങള്‍ ഒത്തുചേര്‍ന്നാണ് യുവതികളെ എത്തിച്ചതെന്നും മുല്ലപ്പള്ളി കോഴിക്കോട് ഡി.സി.സിയില്‍ നടത്തിയ വാര്‍ത്താസമ്മേളനത്തില്‍ പറഞ്ഞു.

സര്‍ക്കാര്‍ വിശ്വാസികള്‍ക്കൊപ്പമാണോ സംഘര്‍ഷമുണ്ടാക്കാന്‍ ശ്രമിക്കുന്നവര്‍ക്കൊപ്പമാണോ എന്ന് വ്യക്തമാക്കണം. ആര്‍.എസ്.എസ് രാഷ്ട്രീയ മുതലെടുപ്പിന് വേണ്ടിയാണ് ശ്രമിക്കുന്നത്. ശബരിമല അയോധ്യയാക്കാനുള്ള അവരുടെ ശ്രമത്തിന് സര്‍ക്കാര്‍ സഹായം നല്‍കുകയാണ്. കോണ്‍ഗ്രസെടുത്ത നിലപാട് മതേതര വിശ്വാസികള്‍ അംഗീകരിച്ചുവെന്നും അദ്ദേഹം വ്യക്തമാക്കി.
പ്രളയത്തില്‍ ദുരിതമനുഭവിക്കുന്നവരുടെ പ്രയാസങ്ങള്‍ പരിഹരിക്കാന്‍ സര്‍ക്കാര്‍ ഇതുവരെ ഒന്നും ചെയ്തിട്ടില്ല. മാസങ്ങള്‍ പിന്നിട്ടിട്ടും പ്രശ്‌നപരിഹാരത്തിനുള്ള രൂപരേഖ പോലും തയാറാക്കിയിട്ടില്ല. പ്രളയപുനരധിവാസ നടപടികള്‍ എങ്ങുമെത്താത്ത സാഹചര്യത്തില്‍ ദുരന്തബാധിതരെ അണിനിരത്തി സര്‍ക്കാരിനെതിരേ കോണ്‍ഗ്രസ് പ്രക്ഷോഭവുമായി രംഗത്തിറങ്ങും. ഇതുമായി ബന്ധപ്പെട്ട് 29ന് തിരുവനന്തപുരത്ത് ചേരുന്ന പൊളിറ്റിക്കല്‍ അഫേഴ്‌സ് കമ്മിറ്റിയില്‍ തീരുമാനമെടുക്കുമെന്നും മുല്ലപ്പള്ളി അറിയിച്ചു.

കേരളത്തിലെ കാര്‍ഷിക മേഖല അതീവ പ്രതിസന്ധിയിലൂടെയാണ് കടന്നുപോകുന്നത്. കര്‍ഷകരുടെ പ്രശ്‌നം മനസിലാക്കി സര്‍ക്കാര്‍ അടിയന്തര നടപടികള്‍ സ്വീകരിക്കണമെന്നും അദ്ദേഹം ആവശ്യപ്പെട്ടു. കോണ്‍ഗ്രസ് അധ്യക്ഷന്‍മാരെയും മറ്റും നിരീക്ഷിക്കാനും ഗ്രേഡിങ് നടത്താനും ഏജന്‍സികളെ നിയോഗിച്ചെന്ന വാര്‍ത്തകള്‍ വാസ്തവവിരുദ്ധമാണ്. ലോക്‌സഭ തെരഞ്ഞെടുപ്പില്‍ മികച്ച സ്ഥാനാര്‍ഥികളെ തന്നെയാവും കണ്ടെത്തുകയെന്നും മുല്ലപ്പള്ളി കൂട്ടിച്ചേര്‍ത്തൂ. വാര്‍ത്താസമ്മേളനത്തില്‍ കെ.പി.സി.സി സെക്രട്ടറി അഡ്വ. പ്രവീണ്‍ കുമാര്‍, ജന. സെക്രട്ടറി അഡ്വ. പി.എം സുരേഷ് ബാബു, ഡി.സി.സി പ്രസിഡന്റ് അഡ്വ. ടി. സിദ്ദിഖ് എന്നിവര്‍ പങ്കെടുത്തു.