തിരുവനന്തപുരം: ജീവനെടുക്കുന്ന ബ്ലൂ വെയില്‍ മൊബൈല്‍ ഗെയിം വ്യാപിക്കുന്നതു തടയാന്‍ നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന്‍ പ്രധാനമന്ത്രി നരേന്ദ്ര മോദിക്ക് കത്തയച്ചു. കുട്ടികളെ ലക്ഷ്യംവച്ചുള്ള ഈ ഗെയിം രാജ്യത്ത് പലയിടത്തും ജീവനുകള്‍ അപഹരിച്ചു കഴിഞ്ഞെന്നാണ് മാധ്യമങ്ങളില്‍നിന്നു മനസിലാക്കാന്‍ സാധിക്കുന്നത്. ഗെയിം നിരോധിച്ച് ഇന്റര്‍നെറ്റില്‍ ലഭ്യമല്ലാതാക്കാന്‍ വിവിധ വകുപ്പുകള്‍ ചേര്‍ന്ന് ആവശ്യമായ നടപടികള്‍ സ്വീകരിക്കണമെന്നും മുഖ്യമന്ത്രി ആവശ്യപ്പെട്ടു.
ഗെയിമിന്റെ വ്യാപനം തടയുന്നതിന് കേരളത്തില്‍ സൈബര്‍ പൊലിസ് സോഷ്യല്‍ മീഡിയ വഴി ബോധവല്‍ക്കരണവും പ്രചാരണവും നടത്തുന്നുണ്ട്. സംസ്ഥാന സര്‍ക്കാരും ആവശ്യമായ നടപടികള്‍ സ്വീകരിക്കുന്നുണ്ട്. ഗെയിം വ്യാപിക്കുന്നതു തടയാനുള്ള ഏക മാര്‍ഗം അത് നിരോധിക്കുക മാത്രമാണ്. അതിന് കഴിയുക കേന്ദ്ര സര്‍ക്കാരിന് കീഴിലുള്ള വിവരസാങ്കേതിക മന്ത്രാലയത്തിനു മാത്രമാണ്. അതിനാല്‍ അടിയന്തിര നടപടി സ്വീകരിക്കണമെന്ന് അഭ്യര്‍ഥിക്കുന്നതായും മുഖ്യമന്ത്രി കത്തില്‍ പറഞ്ഞു.