ന്യൂഡല്‍ഹി: അഞ്ചു ദിവസങ്ങള്‍ക്കിടെ 63 കുട്ടികള്‍ മരിക്കാനിടയായതിന്റെ ഉത്തരവാദിത്തം ഏറ്റെടുത്ത് ഉത്തര്‍പ്രദേശ് മുഖ്യമന്ത്രിയും ആരോഗ്യമന്ത്രിയും രാജിവയ്ക്കണമെന്ന് മുസ്‌ലിം ലീഗ് ദേശീയ സെക്രട്ടറി ഇ.ടി മുഹമ്മദ് ബഷീര്‍ എം.പി.
ഗൊരഖ്പൂരില്‍ മുഖ്യമന്ത്രി യോഗി ആദിത്യനാഥിന്റെ സ്വന്തം മണ്ഡലത്തിലുണ്ടായ ദുരന്തത്തില്‍ മുഖ്യമന്ത്രിക്ക് ധാര്‍മിക ഉത്തരവാദിത്തമുണ്ടെന്നും അദ്ദേഹം കൂട്ടിച്ചേര്‍ത്തു. ജീവകാരുണ്യവും മനുഷ്യസ്‌നേഹവുമാണ് അധികാരം കൊണ്ട് നടപ്പിലാക്കേണ്ടതെന്ന് തിരിച്ചറിയാന്‍ രാജ്യം ഭരിക്കുന്ന സര്‍ക്കാരുകള്‍ തയാറാകണമെന്നും ബഷീര്‍ പറഞ്ഞു.

ഗൊരഖ്പൂര്‍ ആശുപത്രി ദുരന്തം:
പ്രധാനമന്ത്രി മൗനത്തില്‍
ന്യൂഡല്‍ഹി: ഗൊരഖ്പൂര്‍ സര്‍ക്കാര്‍ മെഡിക്കല്‍ കോളജ് ആശുപത്രിയില്‍ പിഞ്ചു കുട്ടികളടക്കം 63 പേര്‍ മരിക്കാനിടയായ സംഭവത്തെക്കുറിച്ച് പ്രധാനമന്ത്രി നരേന്ദ്ര മോദി പ്രതികരിക്കാന്‍ തയ്യാറായില്ല. എന്നാല്‍ സംഭവം നിരീക്ഷിച്ചുകൊണ്ടിരിക്കുകയാണെന്ന് പ്രധാനമന്ത്രിയുടെ ഓഫിസ് അറിയിച്ചു.
ആശുപത്രിയിലെ സ്ഥിതിഗതികളെക്കുറിച്ച് കേന്ദ്ര ആരോഗ്യ സഹമന്ത്രി അനുപ്രിയ പട്ടേലും കേന്ദ്ര ആരോഗ്യ സെക്രട്ടറിയും അന്വേഷിച്ച് റിപ്പോര്‍ട്ട് സമര്‍പ്പിക്കുമെന്നും പ്രധാനമന്ത്രിയുടെ ഓഫിസ് അറിയിച്ചു. ഓഗസ്റ്റ് 10 മുതല്‍ 48 മണിക്കൂറിനകം 30 കുട്ടികള്‍ മരിച്ചതായി ഗൊരഖ്പൂര്‍ ജില്ലാ മജിസ്‌ട്രേറ്റ് രാജിവ് റൂത്തേല അറിയിച്ചിട്ടുണ്ട്.
അതേസമയം ആശുപത്രിയിലെ കുട്ടികളുടെ വാര്‍ഡില്‍ 60 കുട്ടികള്‍ മരിച്ചിട്ടുണ്ടെന്നും എന്നാല്‍ ഇത് ഓക്‌സിജന്‍ ലഭിക്കാത്തത് കാരണമല്ലെന്നുമാണ് യു.പി ആരോഗ്യ മന്ത്രി സിദ്ധാര്‍ഥ്‌നാഥ് സിങ് അറിയിച്ചത്. കുട്ടികളുടെ മരണത്തിന് ഇടയാക്കിയ സംഭവം എന്താണെന്ന് ഗൊരഖ്പൂര്‍ ജില്ലാ മജിസ്‌ട്രേറ്റ് വ്യക്തമാക്കിയിട്ടില്ലെങ്കിലും 21 കുട്ടികള്‍ മരിച്ചത് ഓക്‌സിജന്‍ ലഭിക്കാതെയാണെന്ന് ഗൊരഖ്പൂര്‍ ജില്ലാ പൊലിസ് സൂപ്രണ്ട് വെളിപ്പെടുത്തി.