തെല്‍അവീവ്: ലോക മുത്തച്ഛന്‍ യിസ്‌റായേല്‍ ക്രിസ്റ്റല്‍ അന്തരിച്ചു. 113 വയസായിരുന്നു. വെള്ളിയാഴ്ച ഇസ്‌റാഈലില്‍ വച്ചായിരുന്നു അന്ത്യമെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഹോളോകോസ്റ്റ് കൂട്ടക്കൊലയെ അതിജീവിച്ച ക്രിസ്റ്റല്‍ ലോകത്തില്‍ ഏറ്റവും കൂടുതല്‍ പ്രയാമുള്ളയാളെന്ന ഗിന്നസ് റെക്കോര്‍ഡ് കഴിഞ്ഞ വര്‍ഷമായിരുന്നു നേടിയത്.
1903 സെപ്റ്റംബര്‍ 15ന് പോളണ്ടിലായിരുന്നു ക്രിസ്റ്റലിന്റെ ജനനമെന്ന് ഗിന്നസ് അധികൃതര്‍ പറഞ്ഞു. ഓഷ്‌വിറ്റ്‌സില്‍ കാംപില്‍ നാസികള്‍ നടത്തിയ കൂട്ടക്കൊലയില്‍ ഇദ്ദേഹം അത്ഭുതകരമായി രക്ഷപ്പെട്ടു. ക്രസ്റ്റലിന്റെ ആദ്യ ഭാര്യയും രണ്ടു മക്കളും മറ്റുകുടുംബാംഗങ്ങളും ഈ കാംപിലാണ് കൊല്ലപ്പെട്ടത്. രണ്ടാം ലോക മഹായുദ്ധത്തിന് ശേഷം രണ്ടാമത് വിവാഹം ചെയ്ത ക്രിസ്റ്റല്‍ 1950ല്‍ ഇസ്‌റാഈലിലേക്ക് താമസം മാറ്റി.