അരീക്കോട്: കാവനൂര്‍ ചെങ്ങരയില്‍ റോഡരികില്‍ കക്കൂസ് മാലിന്യം തള്ളി. അരീക്കോട്-മഞ്ചേരി റൂട്ടിലെ ചെങ്ങര കാരാപറമ്പിനു സമീപമാണ് മാലിന്യം തള്ളിയിരിക്കുന്നത്. രാത്രിയില്‍ ടാങ്കര്‍ ലോറികളിലെത്തുന്ന മാലിന്യങ്ങളാണ് ആളൊഴിഞ്ഞ റോഡരികില്‍ തള്ളുന്നത്.
നേരത്തെ ചെങ്ങര തടത്തില്‍ പ്രദേശങ്ങളിലും മാലിന്യം തള്ളുന്നതു പതിവായിരുന്നു. നാട്ടുകാര്‍ കാവലിരുന്നു മലിനജലവുമായെത്തുന്ന ടാങ്കര്‍ ലോറിയെ കൈയോടെ പിടികൂടി പൊലിസില്‍ ഏല്‍പ്പിച്ചതോടെയാണ് പ്രദേശം മാലിന്യമുക്തമായത്. കക്കൂസ് മാലിന്യം തള്ളിയതു മൂലമുള്ള ദുര്‍ഗന്ധം കാരണം ചെങ്ങര പ്രദേശവാസികള്‍ ഏറെ പ്രയാസത്തിലാണ്. കുറ്റവാളികളെ പിടികൂടി മാതൃകാപരമായി ശിക്ഷിക്കണമെന്ന് വാര്‍ഡ് കാവനൂര്‍ ഗ്രാമപഞ്ചായത്ത് സ്ഥിരം സമിതിയധ്യക്ഷ റിഫ്‌ന ബാപ്പുട്ടി ആവശ്യപ്പെട്ടു.