നെടുമ്പാശ്ശേരി: സംസ്ഥാന ഹജ്ജ് കമ്മിറ്റി നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ നിന്നു ഇന്ന് യാത്ര തിരിക്കുന്ന 900 പേരില്‍ 716 പേരും കോഴിക്കോട് ജില്ലയില്‍ നിന്ന്.
ഹജ്ജ് സര്‍വിസിന്റെ ആദ്യ ദിനത്തില്‍ എസ്.വി 5747 നമ്പര്‍ വിമാനം രാവിലെ 6.45 നും എസ്.വി 5749 നമ്പര്‍ വിമാനം ഉച്ചയ്ക്ക് 11.30 നും എസ്.വി 5751 നമ്പര്‍ വിമാനം വൈകിട്ട് 5.45നുമാണ് തീര്‍ഥാടകരെയും വഹിച്ചുകൊണ്ടുള്ള സഊദി എയര്‍ലൈന്‍സ് വിമാനങ്ങള്‍ യാത്രയാകുന്നത്.
ഓരോ വിമാനത്തിലും 300 തീര്‍ഥാടകര്‍ വീതമാണ് ഉണ്ടാകുക. ഉച്ചയ്ക്ക് പുറപ്പെടുന്ന വിമാനത്തിലെ 300 പേരും വൈകിട്ട് പുറപ്പെടുന്ന വിമാനത്തില്‍ 297 പേരും കോഴിക്കോട് ജില്ലയില്‍ നിന്നുള്ളവരാണ്.ആദ്യ വിമാനത്തില്‍ 139 പുരുഷന്‍മാരും, 161 സ്ത്രീകളും യാത്രയാകും. ഉച്ചയ്ക്ക് 11.30നുള്ള വിമാനത്തില്‍ 133 പുരുഷന്‍മാരും, 167 സ്ത്രീകളും യാത്രതിരിക്കും.
വൈകിട്ട് 5.45ന് പുറപ്പെടുന്ന വിമാനത്തില്‍ 132 പുരുഷന്‍മാരും 168 സ്ത്രീകളുമാണ് ഉണ്ടായിരിക്കുക. എറണാകുളം 34, കണ്ണൂര്‍ 25, മലപ്പുറം 102, കാസര്‍കോട് 9, കോട്ടയം 7, പാലക്കാട് 3, വയനാട് 4 എന്നിങ്ങനെയാണ് ഇന്ന് പുറപ്പെടുന്ന മറ്റ് ജില്ലകളില്‍ നിന്നുള്ള തീര്‍ഥാടകരുടെ എണ്ണം.