ലണ്ടന്‍: ഇംഗ്ലീഷ് പ്രീമിയര്‍ ലീഗിലെ സീസണിലെ ആദ്യ പോരാട്ടത്തില്‍ തന്നെ ചാംപ്യന്‍മാരായ ചെല്‍സിക്ക് അട്ടിമറി തോല്‍വി. ബേണ്‍ലിയാണ് നിലവിലെ ചാംപ്യന്‍മാരെ രണ്ടിനെതിരേ മൂന്ന് ഗോളുകള്‍ക്ക് അട്ടിമറിച്ചത്.
ആദ്യ പകുതിയില്‍ തന്നെ മൂന്ന് ഗോള്‍ നേടിയ ബേണ്‍ലിക്കെതിരേ രണ്ട് ഗോള്‍ തിരിച്ചടിക്കാന്‍ ചെല്‍സിക്ക് സാധിച്ചത് വന്‍ നാണക്കേട് ഒഴിവാക്കാന്‍ സഹായിച്ചു. ഫാബ്രിഗസ്, ഗാരി കാഹില്‍ എന്നിവര്‍ക്ക് ചുവപ്പ് കാര്‍ഡ് കണ്ട് പുറത്ത് പോകേണ്ടി വന്നതോടെ ഒന്‍പത് പേരായി ചുരുങ്ങി കളിക്കേണ്ടി വന്നത് ചെല്‍സിയുടെ കളിയെ മൊത്തത്തില്‍ ബാധിച്ചു.
മറ്റു മത്സരങ്ങളില്‍ ആഴ്‌സണല്‍ 4-3ന് ലെയ്സ്റ്റര്‍ സിറ്റിയേയും എവര്‍ട്ടന്‍ ഒറ്റ ഗോളിന് സ്റ്റോക് സിറ്റിയേയും ഹഡ്ഡേഴ്‌സ്ഫീല്‍ഡ് 3-0ത്തിന് ക്രിസ്റ്റല്‍ പാലസിനേയും വെസ്റ്റ് ബ്രോം 1-0ത്തിന് ബേണ്‍മൗത്തിനേയും പരാജയപ്പെടുത്തി. കരുത്തരായ ലിവര്‍പൂളിനെ വാട്‌ഫോര്‍ഡ് 3-3ന് സമനിലയില്‍ തളച്ചു.
പ്രീമിയര്‍ ലീഗിലെ ഉദ്ഘാടന പോരാട്ടത്തില്‍ തന്നെ ഏഴ് ഗോളുകളാണ് പിറന്നത്. ആഴ്‌സണലിനെതിരേ ലെയ്സ്റ്റര്‍ കട്ടയ്ക്ക് നിന്നപ്പോള്‍ മത്സരം ആവേശകരമായി. 3-2ന് പിന്നില്‍ നിന്ന ഗണ്ണേഴ്‌സിനെ രണ്ട് മിനുട്ടിനിടയില്‍ വല ചലിപ്പിച്ച് ആരോണ്‍ റാംസിയും ഒലിവര്‍ ജിറൂദുമാണ് വിജയത്തിലേക്ക് നയിച്ചത്.
ഇടവേളയ്ക്ക് ശേഷം തന്റെ തുടക്കകാല ക്ലബിന്റെ കുപ്പായത്തില്‍ വീണ്ടും കളിക്കാനിറങ്ങിയ വെയ്ന്‍ റൂണിയുടെ ഒറ്റ ഗോളില്‍ എവര്‍ട്ടന്‍ വിജയത്തുടക്കമിട്ടു. സ്റ്റോക് സിറ്റിക്കെതിരായ ഒറ്റ ഗോള്‍ വിജയത്തിലേക്ക് നയിച്ച റൂണിയുടെ ഗോള്‍ 45ാം മിനുട്ടിലാണ് പിറന്നത്.
വാട്‌ഫോര്‍ഡിനെതിരായ മത്സരം 3-2ന് വിജയിച്ച് നില്‍ക്കേ അവസാന നിമിഷം ലിവര്‍പൂള്‍ വഴങ്ങിയ ഗോളാണ് അവര്‍ക്ക് തിരിച്ചടിയായത്.