ഒറ്റപ്പാലം:ഓപ്പറേഷന്‍ അനന്തയുടെ ഭാഗമായുള്ള നടപടികളില്‍ അധികൃതര്‍ മൗനം തുടരുന്നു. റവന്യൂ ഭൂമിയില്‍ സ്ഥിതിചെയ്യുന്ന പി.ഡി.സി ബാങ്ക് കെട്ടിടം പൊളിച്ചു മാറ്റുന്നതിന് ഇതുവരെ തുടര്‍നടപടിയായില്ല. നിയമനടപടികള്‍ക്ക് കാലതാമസം വരുത്തുന്നതായി ഇതിനകം ആരോപണമുയര്‍ന്നിരിക്കുകയാണ്. കൈയേറ്റ വിഷയത്തില്‍ ഒറ്റപ്പാലത്തെ ഏഴോളം സ്ഥാപനങ്ങളാണ് ഹൈക്കോടതിയെ സമീപിച്ചത്. പി.ഡി.സി ബാങ്ക് കെട്ടിടത്തിന്റെ 75 ശതമാനവും റവന്യൂ ഭൂമിയിലാണ് സ്ഥിതിചെയ്യുന്നതെന്ന് നേരത്തെ റവന്യു വകുപ്പ് വ്യക്തമാക്കിയിരുന്നു. എന്നാല്‍ ഈ കൈയേറ്റം ഒഴിപ്പിക്കുന്നതിന്ന് കടമ്പകള്‍ ഇനിയും കടക്കേണ്ടി വരും എന്നാണ് ഇതില്‍ നിന്നും വ്യക്തമാകുന്നത്. ഒറ്റപ്പാലത്തിന്റെ വികസനത്തിന് തടസമായി നില്‍ക്കുന്ന ബാങ്ക് കെട്ടിടം പൊളിച്ചുമാറ്റണമെന്ന അഭിപ്രായം താലൂക്ക് വികസനസമിതിയില്‍ ഉയര്‍ന്നിരുന്നു. ഹൈക്കോടതി അനുവദിച്ച സ്റ്റേ നീക്കംചെയ്താല്‍ നടപടികളുമായി മുന്നോട്ടുപോകുമെന്ന് റവന്യു അധികൃതരും പറഞ്ഞിരുന്നു. എന്നാല്‍ സ്റ്റേ നടപടി നീക്കംചെയ്യാന്‍ സര്‍ക്കാരിന് ഭാഗത്തുനിന്ന് യാതൊരു ചലനവും ഇല്ലെന്ന ആരോപണമാണ് ഉയര്‍ന്നിട്ടുള്ളത്. പൊന്നാനി മഊനത്തുല്‍ ഇസ്്‌ലാം സഭയുടെ കെട്ടിടം റവന്യൂ ഭൂമിയിലാണെന്നറിഞ്ഞതോടെ തുടര്‍ നിയമനടപടികള്‍ക്ക് മുതിരാതെ ഒറ്റപ്പാലം ടൗണിലെ വികസനം മുന്‍നിര്‍ത്തി കെട്ടിടം പൊളിച്ചു നീക്കുകയായിരുന്നു.
മാതൃകാപരമായ സഭയുടെ തീരുമാനം നടപ്പിലായതോടെ റവന്യൂ ഭൂമിയിലുള്ളതും സി.പി.എം നിയന്ത്രണത്തിലുള്ളതുമായ ബാങ്ക് കെട്ടിടം പൊളിച്ചുമാറ്റണമെന്ന അഭിപ്രായമാണ് നഗരവാസികള്‍ പ്രകടിപ്പിക്കുന്നത്.