പെരുമ്പാവൂര്‍: സംസ്ഥാന സര്‍ക്കാര്‍ സീറോ വേസ്റ്റ് ബീക്കണ്‍ മുന്‍സിപ്പാലിറ്റിയായി തെരഞ്ഞെടുത്ത പെരുമ്പാവൂര്‍ നഗരസഭയിലെ സ്വാതന്ത്ര്യ ദിനാഘോഷം ഉദ്ഘാടനവും സീറോ വേസ്റ്റ് പദ്ധതി പ്രഖ്യാപനവും വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ് നിര്‍വഹിക്കും. ഓഗസ്റ്റ് 15 ന് സുഭാഷ് മൈതാനത്തു നടക്കുന്ന പരിപാടിയില്‍ അഡ്വ.എല്‍ദോസ് കുന്നപ്പിള്ളി എം.എല്‍.എ അധ്യക്ഷത വഹിക്കും. നഗരസഭ ചെയര്‍പെഴ്‌സണ്‍ സതി ജയകൃഷ്ണന്‍ സ്വാഗതം ആശംസിക്കും. ശുചിത്വ മിഷന്‍ ഡയറക്ടര്‍ ഡോ. കെ.വാസുകി ഐ.എ.എസ് മുഖ്യപ്രഭാഷണം നടത്തും. ഹരിത സ്‌കൂള്‍ അവാര്‍ഡ് മുന്‍ നിയമസഭ സ്പീക്കര്‍ പി.പി തങ്കച്ചനും ഹരിത റസിഡന്‍സ് അസോസിയേഷന്‍ അവാര്‍ഡുകള്‍ ടെല്‍ക് ചെയര്‍മാന്‍ അഡ്വ.എന്‍.സി മോഹനും വിതരണം ചെയ്യും. ജൈവപച്ചക്കറി മേഖലയില്‍ മികച്ച പ്രകടനം കാഴ്ചവച്ച കുടുംബശ്രീകള്‍ക്കുള്ള പുരസ്‌കാരങ്ങള്‍ മുന്‍ എം.എല്‍.എ സാജു പോള്‍ വിതരണം ചെയ്യും.
ഹരിത ശ്രേഷ്ഠം പുരസ്‌കാരം, അയുതം ഹരിതഭവനം പദ്ധതികളും ഇതോടനുബന്ധിച്ച് പ്രവര്‍ത്തനം തുടങ്ങുമെന്ന് മുനിസിപ്പല്‍ സെക്രട്ടറി അറിയിച്ചു. ഗ്രീന്‍ ടെക്‌നീഷ്യന്മാരുടെ നേതൃത്വത്തിലുള്ള അജൈവ മാലിന്യങ്ങളുടെ തരംതിരിവും കളക്ഷനും ആരംഭിക്കുമെന്നും സബ്‌സിഡിയോടു കൂടിയുള്ള മാലിന്യ സംസ്‌കരണ ഉപകരണങ്ങളുടെ വിതരണം ആരംഭിച്ചുവെന്നും മുനിസിപ്പാലിറ്റി അറിയിച്ചു. ഇതേക്കുറിച്ചുള്ള കൂടുതല്‍ വിവരങ്ങള്‍ക്ക് ബന്ധപ്പെട്ട കൗണ്‍സിലര്‍മാരെയോ മുനിസിപ്പല്‍ ആരോഗ്യ വിഭാഗത്തിലോ ബന്ധപ്പെടേണ്ടതാണ്.